Renwick Heronimo

Renwick Heronimo, curator na Fundacion Museo Arubano (FMA) ta expresa den un entrevista cu nos cu no ta facil pa lanta proyectonan cultural. Y cu na Aruba ta pone hopi enfasis riba balor economico y no cultural.

 Sr. Heronimo a studia critical studies y a sigui varios curso riba e practica di trabao di curator. “Mi a profundisa mi mes den critica di arte y filosofia, tur loke ta trata cu e analisis di cultura y su contexto.” Ora el a yega Aruba bek, el a haya un oferta pa traha riba e proyecto di institui San Nicolas como un area cultural y turistico na nivel mas halto.

“Tabatin un plan di e ministerio di Cultura di e tempo ey (Otmar Oduber, red) y a pidi ami pa por fungi como e curator di e proyecto. E idea tabata pa uza e comunidad di pariba como un aspecto esencial y principal den desaroyo di museonan y otro proyectonan na San Nicolas. Den esaki mi rol tabata varia, pero mi tabata cuestiona hopi e aspecto di balor. Ora ta papia di balor, tin hopi enfasis riba balor economico y no cultural. E balor cultural aki mi ta haya ta sumamente importante. Mescos cu petroleo y fosfaat, cultura tambe por ta un materia prima pa desaroya balor.”

Nos a tuma un bista di e plan San Nicolas Second Tourism Capital of Aruba cu AIB Bank a traha Minister di Cultura a duna e banco e tarea e tempo ey pa traha e plan. Esaki entre otro ta wordo motiva pa un evaluacion cu a sali for di ATA, unda nan ta indica cu tin un trendo bou turistanan cu kier mas cu solo, santo y lama. ‘Nan ta buscando un experiencia local y autenticidad cultural’, segun ATA su evaluacion. E fundacion FMA ta lanta pa maneha 5 museo, di cual 3 mester ta na San Nicolas: Carnival Museum, Community Museum y Industrial Museum (esaki a habri den Watertoren).

Sr. Heronimo a splica cu e proyectonan mas na largo plaso di e fundacion ta depende actualmente di e prioridadnan di e proximo gobierno cu lo sinta.

No a bin na cla ainda si e museonan aki of e plan di ex minister di Cultura lo of a atrae mas turista. Sinembargo sr. Heronimo ta enfatisa e importancia di e proyectonan aki no solamente como atraccion turistico, si no como documentacion di e herencia cultural tangibel y intangibel.

“E proyecto di museonan aki ta purba duna un miho bista den e importancia di e balor cultural di San Nicolas. Di e manera aki tambe por sigui inspira y yuda desaroya e tematica aki.”

Nicolaas Store
E museo comunitario (Community Museum) cu e fundacion lo habri ta localisa den edificio di Nicolaas Store.

“Un manera di wak e museo comunitario ta manera un continuacion di e storia cu e museo di industria a cuminsa cu ne. E museo di industria ta purba conta e historia y e balornan cu ta biba den San Nicolas.  Den caso di museo comunitario, mi a haci hopi investigacion y mi a acerca 30 artista local pa bin cu  proposicion di proyectonan cu lo por wordo exhibi den e museo. Di e 30 aki nos a selecta 20 y en fin 10 di nan lo wordo exhibi ora e museo habri.” Sr. Heronimo ta sigui splica cu e museo comunitario lo tin un exhibicion pero parti den dos, un di e aspecto comunitario en general y e parti di e artista local lo trece luz na diferente perspectiva riba e comunidad y San Nicolas. “Pa miho comprende e balornan cultural profundo presente na comunidad di pariba, ta importante pa cuestiona elementonan cu ta resona cu e comunidad. P’esey nos a invita diferente perspectiva artistico cu cada un lo trata un elemento specifico di e cultura pariba.”

Segun sr. Heronimo, den pasado museonan a enfoca hopi riba colecta artefacto y arte. Tambe riba preservacion y mustra e obhetonan. Sinembargo, tin un trendo cu museonan rond mundo unda ta purba haci e experiencia di e museo mas interactivo. “Esaki tambe ta haciendo cu e museonan di FMA.”

Access Art Gallery
E manera con kier integra artistanan local contemporaneo cu museo comunitario ta recorda riba e Access Art Gallery, un galeria di arte contemporaneo riba e isla. E galeria aki a cera den aña 2008. Sr. Heronimo tabata un di e personanan encarga cu e galeria aki.  “Ora mi a bay biba na Washington tabatin discusion entre ami cu mi partnernan riba e manera con lo mantene e galeria habri. Mi a kere cu mi lo por a logra bay y bin bek pa e galeria pero esaki no a logra, entre otro pa medio di e collapse economico. Tampoco mi partnernan por a yena mi sapato pasobra nan tabata comerciante cu otro debernan. E proyecto Access tabata hopi bunita den mi wowo y mi ta lamenta cu mester a cera esaki.”

Sinembargo sr. Heronimo a declara cu lo tin posibilidad pa habri Access bek.