Informacion cu a yega cerca IOWUA ta indica cu Citgo kier pone placa riba un cuenta, y bay for di Aruba, practicamente ‘bandonando e barco’, segun e sindicalista Boy Anthony. Den e caso aki, IOWUA a pidi cooperacion di gobierno pa cu tanten Citgo no cumpli cu su obligacionnan, y no caba di negosha cu e trahado, nan no mag di bandona Aruba.

Un cos cu sindicato IOWUA tin bon cla, y cu nan a yega di expresa na gobierno, y particularmente na minister di Labor, ta cu Citgo Aruba Refinery (CAR) no por bay ‘zomaar’ di Aruba dia 31 di januari awor. Principalmente no sin cumpli cabalmente cu su compromisonan cu e tin cu su trahadonan y cu pais Aruba.

Minister di Labor.
E siman aki durante un conferencia di prensa minister di Labor, Glenbert Croes, a limita su mes na papia riba e tema laboral di e trahadonan di refineria/terminal y Citgo su responsabilidad legal como dunado di trabou na Aruba. E mandatario a bisa cu e ta na haltura di e preocupacion existente, cu representantenan di Citgo kier bandona nos isla prome cu dia 31 di januari awor, sin cumpli prome cu e trahadonan manera debe ser.

Sinembargo riba e tema laboral, Croes a declara cu gobierno y su ministerio ta para cu ‘e trahadonan den nan lucha pa yega na un acuerdo satisfactorio entre Citgo y nan den e fase final aki’.

Dialuna ultimo e mandatario en cuestion a laga sa cu e mes no ta na haltura si Citgo lo a entrega peticion pa retiro di e trahadonan. Si den caso cu e peticion pa retiro di e trahado no ta drenta di parti di Citgo, esaki no ta duna nan luz berde tampoco pa bandona Aruba. Cu un ‘si’ absoluto, minister di Labor a afirma cu tin instruccion y mecanismo vigente pa no permiti cu ehecutivonan di Citgo coy nan maleta y bandona Aruba, sin cumpli prome cu e compromiso laboral cu nan compania tin cu e trahadonan.

Por locual -segun e mandatario- permiso di retiro no lo wordo duna na Citgo. Muy particularmente cu nos ley laboral ta hopi claro den un tipo di situacion como dunado di trabou den un fase asina. “Ora cu e derecho laboral di e trahadonan ta wordo menasa y ta wordo viola, bo tin e autoridad como minister di Labor pa duna un instruccion pa salvaguardia cu e derecho laboral di tur e trahadonan ta wordo sigura,” el a bisa.

El a agrega cu for di comienso cu nan a drenta gobierno, Citgo a bin cu un ‘slow down’ di su actividad den e refineria. For di e tempo ey, el a haci uzo di su autoridad como minister di Labor pa duna instruccion na departamento di Labor pa no duna permiso di retiro pa Citgo. “E instruccion ey a keda vigente. Ma reiter’e den e caso di e ultimo desaroyonan,” el a bisa. E instruccion aki ta vigente ainda, el a reafirma.

LEAVE A REPLY

Please enter your comment!
Please enter your name here