Tin puntonan menos rasonabel cu mester evalua bon; Wever-Croes no sa si por duna un contesta na Hulanda awe

Ayera mainta Minister Presidente, Evelyn Wever-Croes a tene su di dos reunion cu representantenan di sindicatonan y gremio comercial. Na e momento ey, e mandatario no por a bisa exactamente si pais Aruba ta bay acepta si of no y con, e condicionnan di Hulanda.

Segun e mandatario e proceso aki cu Hulanda ta cambia constantemente. “Mi no sa si nos por duna un contesta mañan (redaccion: awe), pa mi ta hopi honesto. Nos kier pa nos por haci e cos aki bon,” a bisa.

Pues e ta haya cu no ta cumbini niun di e dos parti pa tuma un decision pura, pasobra tin necesidad. Si den caso awe gobierno di Aruba por haya mas tempo for di Hulanda, e no ta descarta cu lo sigui cu e tipo di reunion informativo y di consulta aki otro siman.

Mas espacio

E prome mandatario a bisa cu tin condicionnan cu ta rasonabel y menos rasonabel. Encuanto e puntonan menos rasonabel, gobierno ta buscando e posibilidad di haya mas tempo di Hulanda pa trata nan cu cabes mas friu. E mandatario a contesta Bon Dia Aruba cu nan a purba esey den e dianan anterior.

El a laga sa cu pais Aruba ainda tin un buffer financiero cu por duna espacio pa atende cu su gastonan prioritario, prome cu nan mester tuma un decision transcendental pa pais Aruba. E ta kere cu te ainda pais Aruba tin e luna aki y otro luna, espacio financiero, prome cu mester tuma un decision.

E prome mandatario ta contempla e posibilidad si awe gobierno no ta cla pa duna un contesta. Den e caso aki no mester un espacio di lunanan, pero si nan lo por pidi un par di dianan mas, pa entre otro compronde otro riba diferente puntonan cu Bon Dia Aruba ta trece dilanti den e relato aki. “Si e ta si of si e ta no… basta cu bo ta sigur kico bo a bisa si of kico bo bisa no na dje,” el a laga sa.

Condicionnan

El a expresa cu gobierno no ta negoshando cu Hulanda riba cada un di e puntonan di e lands pakket. E mesun ley ta bisa cu te mita di luna di november ambos partido mester a papia cu otro riba e detayenan, y bin cu un planning con nan lo ehecuta e pakete di reforma. Pasobra ya caba gobierno tabata trahando riba algun di nan.

Pero tin otro puntonan menos rasonabel cu ta demanda mas atencion y consulta pa delibera riba dje, prome cu mester tuma un decision. Ya cu ta trata aki di un ‘rijkswet’ of ley di Reino cu ta dificil pa cambia nan, unabes cu decision ta wordo tuma. E no kier pa gobierno haya su mes forsa pa duna un contest awe mes, despues cu nan a ricibi e concepto final ayera.

Durante e reunion, Prome Minister a duna un splicacion general tocante e dos Consensus Rijkswet cu Hulanda a condiciona nos pais pa bay di acuerdo cune a cambio di e facilidad financiero pa atende nos crisis actual: Tanto e Rijkswet Financieel Toezicht (RFT) y e contrtovercial, Caribische Hervormings Entiteit (CHE).

E mandatario a laga sa cu Aruba lo haya ‘toezegging’ pa forma parti di CHE, como un di e tres miembronan. Segun e mandatario, Hulanda a dicidi di cambia esey, y Aruba lo haya participacion local den e entidad aki. Aunke e no tabata den e documentacion ainda, pero e ta un punto cu a wordo concretisa den e negociacion.

CHE tabata un di e puntonan di preocupacion cu organisacion di pensionado di sector publico (OPPA) y otronan presente a trece dilanti durante e reunion aki. E ta un entidad di supervision di 6 aña di terminacion cu –segun opinion di algun presente– no ta duna espacio pa maneha nos propio autonomia.

Wever-Croes a reconoce cu e presencia di CHE su rol ta laga bo pensa cual ta e rol di un gobierno y di Parlamento. Ainda gobierno ta papiando riba punto crucial aki, ya cu mester trece claridad pa evalua si nos lo bay acept’e. Nan sa cu e entidad lo dirigi su mes cu e landspakket, pero unda CHE su funcion ta caba y esun di nos organo legislativo y ehecutivo ta cuminsa. Ainda e ta un asunto den desaroyo cu nan ta atendiendo cune. Sinembargo el a laga sa cu Parlamento ta keda semper un Parlamento autonomo. Segun e mandatario den e negociacion aki nan no lo yega na un palabracion riba Parlamento su rol. “Esey no ta e intencion tampoco,” el a bisa.

Otro tema frecuente tin di haci riba diferencia entre LAft y e RFT nobo cu ta wordo delibera riba dje ultimo tempo. E mandatario a bisa cu e RFT mes cu ta conta pa St. Maarten y Corsou, Aruba no ta cay den esey. E diferencia entre esun di nan y e RFT di nos ta bay ta “hopi grandi,” el a declara.

El a agrega cu practicamente gobierno ta den negociacion cu Hulanda pa mehora e LAft cu nos tin aworaki. Pues e mesun instrumentonan, pero cu mayor supervision riba compania estatal. Un cambio hopi importante ta cu Hulanda kier pa e ley aki e bira un rijkswet. E ta un ley di Reino cu solamente ta wordo cambia riba nivel di Reino bo tin cu cambi’e, y no na nivel di Parlamento. Pues un rijkswet pa finalisa cune, tampoco ta un proceso facil. Sinembargo e no ta imposibel, si nos a logra cambia te hasta statuut, segun minister presidente. E ta keda otro tema importante pa e negociacion cu Hulanda ainda.

El a declara na e matutino aki cu tabatin representantenan presente cu ta sostene gobierno den cualkier direccion riba e condicionnan aki, basta cu nan ta un decision responsabel. Varios punto cu a sali dilanti den reunion aki entre nan aumento di edad di pensioen di 65 pa 67 aña cu no por a compara e situacion aki cu esun di Hulanda. Te ainda gobierno no a haya sa for di Hulanda kico ta motibo cu a pone e punto aki den e landspakket. Si e unico motibo ta pasobra nan tin’e na 67, e no algo cu ta pas na Aruba, pasobra nos situacion ta diferente, segun premier Wever-Croes. E ta un di e puntonan cu MinPres lo tene cuenta cune den e documento final.

Otro tema cu a hala atencion ta esun di dolarisacion di nos sistema monetario. El a bisa cu e cambio di sistema aki no ta necesario. Tambe esun di e benta di companianan estatal. E mandatario su posicion ta cu no mester bende tur. Tampoco e no ta kere cu esaki ta e intencion di Hulanda.

El a trece cerca trankilidad cerca e sindicatonan di cierto companianan di utilidad bisando cu Hulanda mas bien ta referi riba e compania estatal cu no ta bayendo bon y no riba esun cu si ta bayendo bon. Companianan cu gobierno a descentralisa pa medio di un NV, y toch gobierno ta sigui hinca placa aden.

Tocante e reunion aki, premier Wever-Croes a declara na Bon Dia Aruba cu el a duna un update di e ultimo desaroyonan riba negociacion cu Hulanda. Te ainda den e momento ey, gobierno tabata pendiente di e documentonan cu Hulanda a keda di manda bek, unda ta wordo mira con hopi nan a tene cuenta cu nos puntonan.

Na final di e reunion aki, MinPres a bisa na e matutino aki cu e sinti su mes mas trankil. Te hasta e ta sinti un poco di mas forsa pa sigui negosha y bisa: “Akinan Aruba ta para p’e.” Pero tambe el a saca afo di e reunion aki cu nos ta convenci cu nos mes por, independiente di cual cu ta e decision final. Teniendo cuenta si cu interes di pais Aruba ta wordo sirbi na prome luga.

Unabes cu el a reuni cu e sindicatonan y gremionan comercial, MinPres a bay atende un reunion cu e partidonan politico y den oranan di merdia, el a bay reuni cu Parlamento.