Cada 10 aña ta realisa un Censo nacional na Aruba, y ya caba Oficina Central di Estadistica (CBS) ta bin trahando riba e preparacion di dje. Parlamentario Setty Christiaans-Yarzagaray, kende pa basta aña a traha den CBS -y kende ya caba a experiencia e realisacion di dos censo riba nos isla- ta bon informa tocante e logistica di e censo cu lo tuma luga for di 1 te cu 10 di october 2020.

Christiaans-Yarzagaray kier a trece mas informacion cerca nos comunidad, mirando cu tin un censo piloto realisa pa CBS, y un luz negativo a wordo duna na dje. Como un persona profesional y cu un experiencia amplio riba e tereno aki, e parlamentario ta haya cu e tipo di luz negativo cu a wordo mal duna riba nificacion y importancia di e censo, no ta yuda pa e desaroyo di e pais.

P’esey e ta haya importante pa bin cu un campaña di conscientisacion prome cu e censo lo tuma luga aki un aña pa tur hende por sa pa kico un censo ta necesario pa nos pais. E ta haya esaki logico, pasobra pa mi por duna informacion di mi mes, mi mester sa pa kico e informacion aki ta wordo uza.

Christiaans-Yarzagaray a declara na Bon Dia Aruba cu ley di censo ta obliga bo pa coopera. Sinembargo, pa experiencia e sa cu e prome paso no ta pa reenforsa e ley, sino pa haya informacion basa ariba cooperacion. Tin pais cu ora nan ta realisa un censo, e dia ey ta wordo declara como toke di queda, kiermen niun hende no mag di sali for di nan cas. Na Aruba no ta asina, pues e ta mas flexibel. Esaki ta haci ainda un compromiso y responsabilidad mas grandi cerca nos hendenan pa e censo por resulta exitoso. Pasobra un censo ta un bishita na delaster un vivienda y un persona na Aruba, caminda tur informacion ta keda confidencial y reserva.

Proyecto piloto y informacion.
E proyecto piloto cu ta tumando luga aworaki di parti di CBS ta pa haci un extraccion di informacion pa asina evalua kico nan por adapta y haci miho. Censo ta un proyecto asina grandi cu ta exigi preparacion previo. Entre nan un proyecto piloto pa asina e dia cu e censo ta wordo ehecuta, CBS por ta sigur di e forma cu nan ta bay traha.

E parlamentario a laga sa cu ora nan ta realisa un tipo di censo pa pidi informacion na pueblo, un sintoma cu nan por sinti ta cu miembronan di nos comunidad ta cuminsa bira nervioso y inkieto, ya cu nan ta pensa cu algo asina tin un meta politico of pa averigua asunto financiero pa cobra mas belasting, y esaki no ta e caso.

E ta haya cu sigur un pregunta cardinal y sumamente dificil pa hende contesta ta entrada. Pero e ta un data importante na momento cu por ehempel nan lo bin cu discusion riba hisamento di salario of a determina e grado di pobresa den nos comunidad.

Christiaans-Yarzagaray ta aclaria cu Censo no ta un investigacion caminda bo ta extrai un muestra den comunidad a base di un cierto cantidad di pregunta. Mas bien un censo ta un conteo di tur hende di Aruba, ya cu e ta un conteo di poblacion y vivienda. Durante e censo lo bin un cantidad di pregunta cu lo yuda te hasta pa evalua si ta wordo cumpli cu e metanan di desaroyo global di sostenibilidad (SDG). Ademas e resultado di e censo lo yuda colecta informacion concreto y structura pa determina den cual direccion nos ta bayendo.

 

 

 

 

 

 

LEAVE A REPLY

Please enter your comment!
Please enter your name here