TOPA no a logra mayoria den referendum pa representa trahadonan di APA N.V.

Aunke un grupo considerabel di trahadonan di APA N.V. a vota na fabor di TOPA, e cantidad di votonan deposita no tabata suficiente segun ley di referendum pa TOPA por a logra nan representacion sindical.

Ayera mainta e referendum aki a tuma luga den sala di reunion di APA caminda mediador di gobierno, Anselmo Pontilius a declara na Bon Dia Aruba cu 65 trahado por a haci uzo di su derecho di voto. Pero di e cantidad aki un total di 31 trahado a bin vota den e referendum pidi pa sindicato TOPA, cu tabata e unico sindicato cu a participa den dje. Di e 31 cu a bay vota, un total di 25 a vota pa TOPA. E restonan tabata votonan invalido y voto blanco tambe.

Segun sr. Pontilius e sindicato TOPA tabatin mester di e mita plus un di e total di 65 trahado, kiermen 33 voto pa gana e referendum aki. E sindicato aki no a logra e cantidad di voto rekeri.

Representacion sindical
Mirando cu den luna di september proximo lo mester negosha un contracto colectivo (CAO) nobo, e resultadonan di e referendum aki ta mustra un evidente division entre e trahadonan. Kico lo por sosode rond di nan representacion sindical pa negosha e CAO? Mediador di Gobierno a splica cu actualmente sindicato STA ta representa e mayoria di e trahadonan, y actualmente nan tin un CAO vigente. Considerando cu na e momento aki STA tin un mayoria di trahadonan como miembro, logicamente e dunado di trabou tin un obligacion di negosha cu e sindicato mayoritario.

Den caso cu e dunado di trabou tin duda cu STA ta conserva e mayoria di e miembronan, nan por evalua esaki. Kiermen cu si nan ta mira cu un grupo di trahado a bay un banda y otro grupo otro banda, e por scoge pa bisa cu e kier negosha cu dos sindicato. Sinembargo e dunado di trabou no ta obliga pa haci esey, segun mediador di gobierno. Pero pa ley si e ta obliga pa negosha cu e sindicato mayoritario y den caso aki esaki ta un echo.

Otro posibilidad ta cu mirando e division aki, e dunado di trabou pa ley por pidi un referendum pa haya un claridad den su empresa. “Esey por y el a yega di pasa caba”, asina sr. Pontilius a bisa. E ley di referendum ta bisa cu tanto e sindicato of sindicatonan, pero e dunado di trabou tambe por pidi un referendum den cual ta wordo conduci pa mediador di gobierno, pasobra e kier tin un claridad.

Independientemente di e resultado di e referendum di ayera caminda TOPA no a logra e mayoria, mientras cu sindicato STA a abstene di participa den dje, esaki no kiermen cu e trahadonan di APA no tin representacion sindical. Absolutamente nan no ta keda sin proteccion sindical, ya cu den e caso aki, un grupo mayoritario di trahado keto bay ta miembro di STA. Tambe e ley ta protege e trahadonan den e parti aki.

You May Also Like

Sindicato TOPA sperando pa reuni cu minister e siman aki riba situacion di Meteo

Manera Bon Dia Aruba a publica algun dia pasa, aparentemente atrobe a surgi algun ...

29foOceanZ.jpg

Varios negoshi di apartamento operando riba tereno erpacht

Segun informacion obteni for di Kadaster, e terenonan riba e strip di Malmok tur ...

higiena

Control lo sigui conforme ley durante temporada di carnaval

Temporada di Carnaval a cuminsa oficialmente y ya caba directora di Departamento di Higiena ...

Plasterk: Hulanda no ta mucho interesa den Aruba

Minister Ronald Plasterk di Hulanda encarga cu Asuntonan di Reino a bishita Aruba ayera ...

Casonan di malesa transmiti sexualmente ta aumentando

Casonan di malesa transmiti sexualmente ta aumentando cada dia mas na Aruba. E specialista ...

Jaime Salcedo

Benta ticket a aumenta awor cu lo elimina visa Colombia

Ex presidente di Asociacion Amigos de Colombia (ASOCOL) y agente di biahe, sr. Jaime ...