Biento halto a dal parti di Europa central ayera. Esaki a ocasiona cu dos persona a perde nan bida na Slovakia y Alemania, tambe a interumpi servicio di trein na parti di Alemania y a pone clausura temporario di dos zoologico na Berlin.
Polis di Slovakia a bisa cu un mucha homber di 14 aña a muri ora cu un palo di mata a cay riba dje na Nitra. Hunto cune, un grupo di studiante tambe a wordo herida, un di nan su condicion ta serio.
Banda di Slovakia, na Republica Checo, un 30.000 cas a keda sin electricidad, ora cu palo di mata tabata keda cay riba caminda y unda trein ta pasa, creando interupcion.
Na Alemania, linea di trein di distancia largo for di Berlin na Hamburg y Hannover, y na Straslund den skina nort oriental di e pais, tabata entre esunnan cera ayera mainta y despues habri bek. Na sur Alemania, un palo cu a cay a forsa pa cera e linea Nuremberg-Augsburg.
Cerca di Wolfsburg, entre Hannover y Berlin, un trein di velocidad halto a dal contra un palo cu a cay banda di caminda. E chauffeur a resulta herida. A spera biento fuerte nort di Alemania pa e resto di dia.
E dos zoologico di Berlin tabata cera pa motibo di riesgo halto di mata cu ta cay, y a trece e animalnan paden. Cerca di Dortmund, servicio di bombero a uza boto y pasarela improvisa pa rescata bestia for di campo, pasobra tabata bou di awa pa motibo di awasero fuerte.
Agencia di noticia DPA a informa cu e campo tabata bou 2 meter bou awa y cu algun bestia a muri pa inundacion. Alrededor di 200 persona a wordo rescata.
