Ayera mainta tempran, un biaha mas e trahadonan di EcoTech y EcoGas a bay protesta dilanti Parlamento pensando cu ayera nan ta trata e asina yama Ley di Serlimar. Pero un rato despues cu nan a yega cu nan trucknan, nan a ricibi e sorpresa cu e organo legislativo a dicidi di pospone e reunion publico aki eventualmente pa diaranson awor.
Alfredo Ruiz, kende ta director di ambos compania, a declara na Bon Dia Aruba cu e plan tabata ta cu e ley controversial aki a wordo trata pa 9or ayera. A base di esey, nan a dicidi di bin cu tur nan trahadonan, pero unabes cu nan a haya sa cu e tratamento di e ley a wordo posponi, e ora nan a dicidi di bandona e sitio.
Un biaha mas nan a dicidi di protesta contra e ley aki, ya cu nan ta haya cu e ley aki ariba su mes ta discriminatorio. E tin cierto componente cu ta conduci cu cualkier otro compania priva cu ta atende cu recoleccion di sushi no por competi. E ta haya cu esaki ta un forma pa nan saca bo for di mercado di un manera fini.
Aunke e mandatario encarga cu Serlimar a bisa cu no tin monopolio, sinembargo e manera con e ley aki a wordo hinca –segun Ruiz- ta imposibel cu un compania priva por sobrevivi cu un entrada di 7.50 pa brinda e servicio aki pa luna, y asina competi cu Serlimar. Esaki ta practicamente imposibel, segun Ruiz.
El a bisa cu te hasta diferente gremio entre nan KvK, AHATA, ATIA y organo consultativo manera Raad van Advies (RvA) a yega di reacciona contra e aprobacion di un ley asina, y nan a pidi pa para un rato e ley aki pa duna tempo. Nan a duna un señal cu tin algo cu no ta klop cu e ley, segun Ruiz. E ta haya cu en bes di bin pura cu e ley aki, ta importante pa nan tuma tempo y studia esaki bon pa bin cu algo cu por cumbini tur hende.
