Trahadonan di ELMAR NV a haya nan pago di ahuste di costo di bida. Gerencia a bay de acuerdo cu e pago di Diaranson caba, cu ta nifica cu ya no mester ta pendiente cualkier accion.
Asina Raymond Maduro di sindicato ALVAST a informa Bon Dia Aruba. “Gerencia a yama mi Diaranson atardi y a laga sa cu nan ta bay paga e ahustacion di costo di bida na Augustus,” Maduro a bisa. “E ta nifica cu e lo bira un ‘back pay’ di un luna, pasobra lo mester a paga e suma dia 1 di Juli.”
Maduro ta confirma tambe cu Gerencia di ELMAR a sigur’e cu no ta bay kita oranan cu trahadonan a protesta pa nan pago di indexering. Inicialmente e tabata mustra cu e accion lo a nifica cu no ta haya pago pa e tres oranan cu a pone trabou abou. “Pero e trahadonan a bringa pa nan derecho y mirando cu ta Gerencia no a cumpli cu e protocol firma entre e partidonan, a declara e carta cu a manda pa trahadonan, cu hopi a interpreta como intimidante, como nulo.”
Manera ta conoci siman pasa Diabierna, personal di staf di ELMAR a entrega yabi, auto y badge riba Diabierna y a demostra Dialuna siguiente pa motibo cu no a cumpli cu e protocol di 2019 cu ta paga indexering. E pago di indexering of ahuste di costo di bida no tin nada di haber cu e recorte den salario di tur personal, esta e 12.6 porciento cu tabata condicion di Hulanda pa Aruba por haya sosten di likides.
