Trahadonan di GKMB a protesta; No ta acepta cu DRH a nenga ‘gevaren toelaag’

ORANJESTAD – Trahadonan di GKMB a bay den protesta diamars mainta. Nan tin algun punto cu nan ta buscando atencion riba dje di parti di e minister Dangui Oduber, specialmente riba ‘gevaren toelaag’ of compensacion pa peliger. Pero Departamento di Recurso Humano (DRH) a rechasa esaki.

Nan ta haya cu e minister di salubridad publico, caminda e departamento aki ta resorta, no kier duna nan atencion. Mientras cu for di dia 3 di april ultimo, nan a solicita un reunion urgente cerca dje.

Mal contento
Efraim Lampe, kende ta shopsteward, a laga sa cu e mandatario a manda un contesta pa SEPPA, pero loke e trahadonan a pidi ta un reunion. “E ta contesta bashi,” el a declara. Nan kier reuni cu e mandatario hunto cu e sindicato.

Nan a sali afo pa reuni den forma di protesta pa haya atencion di minister Dangui Oduber. “E trahadonan ta mal contento. Nan no ta bin pafo por nada,” el a bisa.

E no ta nenga cu e departamento aki a wordo ekipa cu cierto material, pero algun di nan no ta apto pa e trabou di hopi risico cu nan ta realisa. Nan a haya coverall, pero esaki no ta apto pa e insecticida venenoso cu nan ta traha tur dia cune.

Oduber a yega di expresa cu ta sindicato a mal informa e trahadonan, ya cu el a regla tur cos pa nan. Sinembargo, ayera e trahadonan mes a sali protesta. Lampe, kende a para pafo cu e empleadonan, a aclaria cu no ta SEPPA a pidi pa nan bay pafo. Sino cu e trahadonan a firma pa pidi un reunion cu minister. Nan ta haya cu tin asuntonan pendiente pa atende cune. Nan mester di personal, y nan punto cardinal ta e compensacion of toelaag pa e tipo di trabou peligroso cu nan ta realisa.

Rechaso di DRH ta inaceptabel
Hasta nan a entrega un rapport traha pa ImSan riba con e trahadonan tin cu bisti y con nan mester traha cu insecticidanan. Tambe nan a traha un documento cu tur e peligernan cu e trahadonan ta confronta diariamente.

Nan no sa si e mandatario of Departamento di Recurso Humano a lesa nan, pa asina nan ta mas consciente di loke e trahadonan ta pidi. Mientras nan sa cu departamento di salud publico (DVG) si a haci su investigacion. Aunke nan a sinta na juli aña pasa cu e mandatario, y te hasta nan tin contacto cu nan coordinador, pero ainda nan peticion no a wordo honra, sino mas bien rechasa pa DRH.

El a laga sa cu nan a sali contento di e reunion di aña pasa debi cu e minister tambe a bay di acuerdo cu e trahadonan pa nan haya e compensacion aki. Pero dia 12 di maart ultimo, nan a haya contesta di DRH cu a rechasa e peticion di departamento di salubridad publico (DVG), caminda GKMB ta resorta. “Nos no ta bay acept’e. E risico ta altisimo,” Lampe a bisa.

E ta haya inaceptabel cu DRH a nenga un peticion di DVG pa e trahadonan di GKMB por haya un compensacion, debi cu nan pone nan bida den riesgo. “E trahadonan no ta bay guli e cos ey facil,” el a bisa. El a splica cu e peticion aki no a bin di su mes, sino cu DVG a haci un investigacion prome pa asina formula e peticion di e trahadonan.

Lampe a indica cu e trabou cu nan ta realisa pa comunidad tin hopi risico cune. El a trece dilanti cu ora por ehempel nan ta drenta den mangel, nan no sa si nan lo sali bon of resulta herida. Tambe nan mester drenta den edificionan cu ta basta deteriora, cu casi ta cay den otro, pa realisa control di criadero di sangura cu ta afecta salud publico.

Di su banda, Nicomedes John, kende tambe ta shopsteward, a splica cu e mensahenan cu e mandatario a manda via sindicato SEPPA a yega cerca e trahadonan. Pero e problema ta sinta cu nan no ta di acuerdo cu e contestanan aki.

John a bisa cu GKMB ta un departamento hopi importante pa Aruba. Si por ehempel nan ta dicidi di no spuit mas veneno pa combati e criadero di sangura, si e noticia aki ta yega internacionalmente, e turistanan no ta bin Aruba mas.

P’esey e trahadonan ta haci un apelacion pa e minister cuminsa duna nan mas atencion. “Como un bon dunado di trabou, mi kier sa bo tin cu zorg pa bo trahadonan,” el a bisa.

E sindicalista Edmundo Marlin di SEPPA a splica cu loke ta pasando cu e trahadonan di GKMB ta ignorancia di minister. E minister mes a bisa cu e no tin problema pa sinta na mesa. Sinembargo, ainda e no a honra e peticion di e trahadonan pa reuni cu nan.

Mientras cu ayera a laga cu e situacion aki a scala. “P’esey e no por yama e situacion aki nada otro cu ignorancia di parti di e mandatario en cuestion.”

 

You May Also Like

Fondo di FDA a conoce su fin y AIB bank ta sigui normal

AIB bank (Aruba Investment Bank) tabata responsabel di administra e fondonan di FDA pa ...

FTA ta lamenta cu trahadonan di The Mill Resort no ta bay gosa di representacion sindical

ORANJESTAD – Vice presidente di FTA, Tyrone Bremo, a lamenta cu mayoria di e ...

Ainda SIA no sa cuanto cliente no a paga number di auto

E cantidad di hende cu ainda no a paga e number di auto 2017 aparentemente ...

Ladronnan a bay cu basta caha di azeta for di deposito

Dialuna mainta personanan encarga cu un deposito di azeta cu tin na Cumana a ...

Instancianan social ta exigi compromiso di gobierno

Den prome conferencia di prensa di gobierno di Aruba pa 2018, prome minister Evelyn ...

klapchi

25 container di klapchi den total e aña aki

A bin un total di 18 container, a sobra 7 container di aña pasa. Pa ...