Trahadonan di departamento di limpieza (housekeeping) di hotel Holiday Inn a acerca redaccion di Bon Dia Aruba pa conta riba e ‘abuso’ cu gerencia di e hotel ta comete contra nan, na momento di no cumpli cu ley y duna nan 4 ora paga pa bay vota diabierna awo.

“Nos ta un grupo chikito, nan tin nos como hende di segundo categoria. Hendenan manera nos no ta bal”, e grupo di trahadonan di housekeeping a conta redaccion mediante un carta. “Ta un grupo cu por vota, nan a bay cu nan carchi di votamento pa indica cu nan por vota y haya e orario di 4 ora paga.” Segun e trahadornan, gerencia di e hotel a indica cu lo ‘drecha’ e trahadonan nan ora pa nan por bay vota, pero a bisa cu nan no mag di haya cuatro ora paga, sino cu segun e hotel, gobierno a indica cu duna e orario en cuestion ta ‘opcional’. “E no ta asina, e ta un ley cu nan tur tin cu haya 4 ora paga.”

Recientemente, Aruba Trade and Industry Association a manda un recordatorio riba topico di tempo liber riba dia di eleccion y a duna un splicacion practico pa comercio di Aruba riba e tema aki.

“Pa por elabora riba e pregunta, si un empleado mester haya tempo liber pa eherce su derecho pa vota riba dia di Eleccion, ATIA ta informa lo siguiente: Tanto e Codigo Civil (Burgerlijk Wetboek) y e Kiesverordening ta stipula cu un empleado tin derecho riba tempo liber pa por haci uso di su derecho di vota. Segun e Kiesverordening, un empleador ta obliga pa otorga riba dia di Eleccion, entre e ora nan di 8or di mainta pa 7or di anochi, cuatro (4) ora laboral consecutivo na su empleadonan cu tin derecho pa vota, a menos cu e empleado ya caba tin liber pa otro rason riba dia di Eleccion”, ATIA a splica den su comunicado di prensa. Ademas a aclaria cu e empleador tin derecho pa puntra un empleado pa mustra su carchi di votacion, algo cu e trahadornan en cuestion a bisa di a presenta na e gerencia di e hotel. Esaki ta haci referencia na Articulo 40 di e Kiesverordening, cu ta bisa: “Tur empleador ta obliga di garantisa cu su empleado cu ta autorisa pa participa den e votacion, riba e dia di votacion durante e tempo di votacion specifica den Articulo 39, tin al menos cuatro ora di trabao consecutivo liber, a menos cu e trahado tin cuatro ora consecutivo liber durante e oranan den cual por vota pa otro motibo.”

Pero segun e empleadonan, Holiday Inn a dicidi di cambia e trahadonan nan warda, for di 9am-5pm, pa 7or di mainta te 3or di atardi y no ta haya e 4 oranan paga pa bay vota. Den ley tin un stipulacion den cual por nenga di duna e oranan:“Empleado ta traha Part time y tin 4 ora consecutivo liber den orario cu urnanan ta habri riba dia di Eleccion.” Sinembargo, manera por nota riba schedule di e trahadonan, no ta trata aki di empleado part-time sino full-time, loke ta nifica cu nan no ta cay den e excepcion aki.

“E pregunta ta dicon e otro departamentonan: Accounting; front desk; cushina; food and beverage; laundry; personal; y hefenan, tur e trahadonan aki si ta haya nan 4 ora liber y paga? Anto nos cu nan ta trata como segundo clase si no tin derecho riba esaki”, e trahadonan a expresa den nan carta. “E no ta husto.”

Bon Dia Aruba a acerca departamento di recurso humano di Holiday Inn via un yamada, pero no a logra ricibi contesta inmediato riba e asunto. Bon Dia Aruba lo follow-up cu gerencia di e hotel den nos siguiente edicion.

 

LEAVE A REPLY

Please enter your comment!
Please enter your name here