Secretario di Estado pa Asuntonan Interno y Relacionnan di Reino, Raymond Knops mediante un carta na Tweede Kamer a confirma cu pronto lo transferi 90 miyon euro na e St. Maarten Trust Fund. Esaki ta trata di e tercer tranche di sosten di likides.

Den un carta fecha dia 7 di december ultimo, Knops a splica cu e deposito di e tercer y di cuatro tranche originalmente tabata programa pa 2018, pero pasobra e fondonan ya deposita tabata suficiente e tempo aya pa e proyectonan den ehecucion, a dicidi pa retrasa e transferencia di e tranchenan en cuestion.

Mientras tanto, e mayoria di e fondonan di e prome y segundo tranche, respectivamente 112 miyon y 150 miyon euro, deposita den e Trust Fund na april y october 2018, a caba. Un tercer tranche ta necesario pa tuma obligacionnan nobo pa ehecucion di proyectonan nobo.

Un tercer tranche di 90 miyon euro ta necesario pa sigura progreso den ehecucion. Sin e deposito aki lo tin retraso pasobra Banco Mundial no por tuma mas obligacion”, Knops a declara den un documento adhunto na e carta.

Pa cu esaki, Knops a informa Tweede Kamer cu e tercer tranche di 90 miyon euro lo ser transferi internamente na e item presupuesto di Relacionnan di Reino, di cual lo pasa esaki na Banco Mundial, e institucion cu ta maneha e Trust Fund.

Despues di e transferencia aki di 90 miyon euro, un maximo di 101.1 miyon euro ta keda reserva den e presupuesto general pa reconstruccion di St. Maarten. E transferencia di e di cuatro tranche ta anticipa pa e segundo mita di 2021.

Gobierno Hulandes a dicidi na fin di 2017 pa sostene St. Maarten financieramente despues cu e isla a keda devasta pa horcan Irma dia 6 di september e aña ey. Gobierno Hulandes a aloca 550 miyon euro, di cual a pone un maximo di 470 miyon euro disponibel via e Trust Fund na Banco Mundial.

Banco Mundial ta ricibi financiamento den tranche y e uso di e placa ey ta permiti solamente si a sigui e proceduranan corecto y a cumpli cu tur rekisito, manera maneho di compra; maneho financiero; maneho di proyecto; monitoreo y evaluacion; y reporte periodico riba e proceso.

E item specifico presupuesto di Relacionnan di Reino lo ta suheto na un evaluacion di politica na 2021. A aloca e fondonan pa e Trust Fund na e item di presupuesto aki. Knops a declara cu preparacionnan pa e evaluacion aki ya a cuminsa.

LEAVE A REPLY

Please enter your comment!
Please enter your name here