Otro aña na januari SKOA ta cumpliendo oficialmente 50 aña di existencia. E ultimo añanan SKOA ta den un proceso di innovacion. Den cuadro di innovacion ayera Sra. Lisi Werleman-Paris y Joseany Geerman a anuncia cu SKOA lo cuminsa cu su proceso di inscripcion online.

Inscripcion

Nan a cuminsa keto bay dia 30 di november y e prome tanda di e inscripcion online aki lo core te dia 31 di januari venidero. Nan ta tuma un tempo pa procesa e informacion obteni y asina cuminsa ubica e muchanan. Despues SKOA lo bin cu e di dos tanda di inscripcion, unda e mayor por haci escogencia unda SKOA tin luga habri ainda.

E hecho cu nos ta bibando un pandemia pa causa di Covid-19 a haci pa SKOA sigui cu su innovacion riba tereno digital. Sra. Werleman-Paris kende ta funcionario di staf di SKOA a bisa cu nan ta consciente cu e proceso aki di inscripcion online ta tuma su tempo. Normalmente e proceso di inscripcion ta entre october y november. Pero nan kier a tuma un tempo prudente pa duna e servicio y tambe pa guia e mayornan den e proceso aki. Ademas nan tin 46 scol y e ta un proceso grandi pa hinca tur e informacion aki den nan sistema digital. Awor cu nan a inicia cu e proceso di inscripcion online nan ta spera cu esaki lo facilita e trabao aki.

Sra. Geerman kende ta atende cu e parti di administracion di alumno a duna mas detaye riba e procedura di e alumnonan cu ta bay di preparatorio pa scol basico. E otro procedura tin di haci cu alumnonan cu ta inscribi pa prome biaha. E ta e mucha cu tin 4 aña y cu ta saliendo for di un crèche drentando kleuterschool. Pa esaki e mayor mester subi e website di SKOA: www.skoa.aw unda e ta scoge e parti unda ta poni “inscriptie”

 

SKOA ta conta cu 46 scol cu un poblacion total mas cu 9.600 studiante. Cada aña nan ta ricibi un grupo di entre 800 pa 900 mucha cu ta drenta kleuter. E ta casi cantidad di kleuter pa scol basico. E ta alrededor di un total 2 mil mucha pa scol preparatorio y basico.

Nan tin 15 scol preparatorio, 25 scol basico, 5 MAVO scol y 1 scol special. Pa esunnan interesa riba SKOA su Facebook page ta wordo splica con e proceso di inscripcion online por wordo haci debidamente desde cualkier sitio. E mayornan no mester di un computer (PC) ya cu for di nan celular inteligente nan por haci’e, solamente Wifi bo mester tin pa haci e inscribi y aplica pa un cupo pa bo yiu pa e aña escolar proximo (2021-2022). Sra. Werleman-Paris a indica cu si tin algun inkietud di parti di e mayor, semper nan por tuma contacto cu SKOA pa asina haya asistencia.

Informacion y ayudo

Nan tin diferente plataforma di informacion cu e mayor por consulta libremente. Nan tin Facebook page di SKOA, pero tambe mayoria di scol tin nan propio plataforma digital. Tambe tur studiante di SKOA tin un e-mail account cu ta bira un canal di comunicacion di e maestronan cu e mayornan. Tambe e mayor por tin contacto directo cu scol di su yiu, logicamente manteniendo e regla di DVG. “E forma di contacto t’ey,” asina Sra. Werleman-Paris a declara ayera.

E pago tambe ta bay online via Arubabank so. Pero pa esnan cu no tin cuenta den e banco aki nan tin facilidad pa haci e pago na SKOA mes. Pa otro aña escolar nan lo busca otro solucion pa facilita e forma di pago di inscripcion.

Tambe pa e mayor cu tin problema financiero debi na e situacion cu nos ta pasando aden pa causa di e pandemia, tin diferente forma pa yuda nan. Un di nan ta e fondo crea pa diferencia instancia pa atende cu situacion di pago. Tambe SKOA ta ofrece areglo di pago. Igualmente tin scolnan cu di nan mes ta yudando e famianan den necesidad.

Rekisito

Sra. Geerman a enfatisa pa e mayor tene cuenta cu e inscripcion a cuminsa caba y ta bon pa nan haci e inscripcion di e yiu tempran. Ta importante pa e mayor haci esaki na tempo, vooral den e prome tanda di inscripcion pa bo por haya e scol di bo escogencia.

Asina e por haya e posibilidad di haya e scol cu e ta desea pa su yiu. Ya cu e di dos tanda di inscripcion online nan no por garantisa esaki. Pa e mucha cu ta sali for di scol preparatorio (kleuterschool) pa switch pa scol basico den nan caso mayornan lo bay ricibi un carta via scol entrante awe cu un splicacion con pa haci esaki.

Un rekisito exigi pa inscribi bo yiu tin di haber cu e AZV number di e mayor pa asina sigui cu e proceso di yena e informacion di bo yiu. Ora di cuminsa cu e proceso aki bo mester tene na man e carchi di AZV valido. Si e mayor no tin esaki, SKOA tin e app di AZV, caminda bo por download esaki. Pa esnan cu no tin AZV, mayornan mester cumpra un seguro valido pa aña escolar 2021-22. Tambe e mayor mester e papel di Censo. Bo por usa e paspoort di e mucha y/of tambe e acta di nacemento.

Sra. Geerman a bisa cu SKOA no ta nenga niun mucha oportunidad pa studia apesar cu nan status legal no ta na ordo. Den e caso aki mester presenta e paspoort di e mucha y nan tin cu cumpra un seguro valido mirando cu nan no tin AZV.

Tin caso cu e mayor no tin nan documento legal na ordo pa cumpra e seguro. Pero nan por haci uso di un famia di dje pa nan bira e persona di contacto pa cera un seguro escolar pa e mucha por inscribi pa bay scol. Sra. Geerman a bisa cu e seguro aki ta importante no solo pa e mucha, sino pa e mayor mes. Pasobra si algo pasa cu e mucha, bo tin e seguro di scol cu ta duna bo cobertura.

“Nos ta purba di yuda te na unda cu nos por. Nos a yuda hopi,” el a bisa. SKOA ta consciente cu e mucha aki mester di un enseñansa y si nan tin e cupo y luga den nan scol, nan ta man habri pa tuma nan.

Sra. Werleman-Paris a bisa cu e aña aki SKOA a haci apelacion na e scolnan pa baha e peticion di dianan di studio, mirando cu a perde varios dia na cuminsamento di e pandemia. “Te aworaki esey ta bayendo bon!.” el a bisa. Na inicio si nan tin tres periodo caminda nan ta haci un trayecto di profesionalisacion pa nan maestronan, y nan ta periodonan cu ta wordo informa adelanta, el a laga sa.

 

 

LEAVE A REPLY

Please enter your comment!
Please enter your name here