Home Editorial Transparencia den bon direccion?

Transparencia den bon direccion?

545

Ainda falta…

E siman aki nos prome minister a tuma un bon decision: el a duna parlamento e contract completo di Citgo, pa nan mes por mira kico ta kico. Naturalmente esey no ta un tarea asina facil; e ta un bon monton di papel pa bay lesa. Pero esey no mester ta problema, pasobra ta p’esey nos ta paga nan? Pa e salario cu nan tin hopi hende lo ta dispuesto pa traha masha duro mes, anto no mester tene duele di nan. Na su debido tempo nos lo por debati tocante e particularidadnan positivo, negativo, o ningun di dos. Pero pa nos, e gesto ey no tabata importante pasobra porfin parlamento a haya e documento controversial aki, pero esey tabata e hecho cu el a mustra cu esaki ta segun e modelo nobo di opera como gobierno, unda transparencia ta di primordial importancia. Completamente di acuerdo, y ta di spera cu ta bay sigui den e mesun direccion aki.

Sin embargo, esey no ta kita nos preocupacion pa loke ta nos futuro inmediato. No tanto si e refineria ta bay habri of no, nos mester dispidi di esey en todo caso. Tampoco si e contract cu Pdvsa/Citgo ta trece hopi riesgo pa nos, ya cu manera e situacion ta actualmente, no ta nos lo cay den incumplimento eventualmente, pero e riesgo mas grandi ta cu e otro partner no por cumpli. Por ehemplo esey por implica cu nan no ta paga e suma pa daño y perhuicio, cu nos sa cu ta den e contract sin mira esey. Con real esaki ta? Hopi, pasobra tanto Pdvsa y su subsidiarionan, y gobierno Venezolano mes ta na borde di bancarota. Y si bin un gobierno nobo mas aceptabel mes cerca nos bisiñanan, nan lo tin otro cos pa haci cu placa cu bay paga daño aki. Esaki lo tin como consecuencia cu nos mes mester wak anto ta kico nos ta haci, aunke cu mester tene cuenta tambe cu e contract ta indica un periodo te 2020 cu e compania tin pa start operacion. Pero, mirando e periodo largo cu tin mester pa haci henter e rehabilitacion, si tabatin placa, por ta cu tin un claridad den ki direccion nos ta bay prome cu fin di e aña aki.

Esey tampoco ta implica cu mester sinta warda te fin di aña pa mira kico ta bay sucede. Di e banda ey ta bon cu ya ta mira cu tin iniciativa pa proyecto nobo, sigur na San Nicolas, manera e posibel yegada di un servicio di ferry pa conecta nos cu e otro islanan. Sinembargo, aki tambe ta miho anda cu cautela, pasobra tin hopi factor cu ta hunga un papel prome cu un ferry por cuminsa core. Interogante manera e volumen di pasahero, local o turista, e volumen di carga vice versa, etc. Dia nos yega asina leu, por bay discuti esey. En todo caso, ta bon cu ta señala cu tin cierto iniciativa cu por adelanta awor caba. Pero, esaki ta trece un otro riesgo cu ne, y esey ta cu ta trece diferente iniciativa dilanti, sin cu tin un bon bista riba e totalidad den un plan integral.

Y ta aki otro tipo di transparencia ta bira importante: bisa nos unda nos ta bay, y no manera nos a mira desde 1986, cu pueblo ta haya sa di e plannan, den forma di loke na Hulandes nan ta yama ‘hapklare brokjes’: tiki tiki, pida pa pida ta haya tur cos pa guli. Obviamente nos no mester ta interesa den cuminda di cacho, no den e tipo di asunto aki en todo caso. Asina ta, na cierto momento nos lo desea di mira e plan total, sigur ora ta trata di un ciudad manera San Nicolas, unda mester bay enfoca nos esfuersonan pa pone su desaroyo pareu cu otro partinan di nos isla. Y den esaki nos no mester di cuminsa from scratch pasobra tin varios plan y documento sumamente valioso den e caso aki. Un di nan ta e plan cu gobierno anterior a desaroya hunto cu expertonan di universidad di Pennsylvania, cu tin hopi elemento valioso pa e desaroyo urbano di e ciudad. E plan aki ta contempla dos fase, e prome cu e refineria presente ainda, y e otro cu e firme conviccion di e expertonan cu e refineria lo no t’ey pa semper. Nos ta ocho aña mas leu y nan, y hopi otro, a haya rason.

E otro ta e plan cu Camara di Comercio a presenta pa desaroyo nobo riba e total di e tereno di e refineria na 2013, saliendo e tempo ey caba cu na dado momento nos lo tin un Aruba sin refineria. E plan aki ta encera varios aspecto interesante, manera e posibilidad di crea un haf pa transshipment di container, cu posibilidad di ricibi container carrier grandi, algo cu na Barcadera no ta posibel. Den e sentido aki, di cuminsa haci bon uzo di e miho haf cu Aruba tin pa un ferry, ta pas bon den sigui explora kico mas por haci riba e tereno aki. En todo caso, ta importante cuminsa papia cu informacion y dato real riba mesa. Let’s talk!