Ya ta tres aña caba cu mundo a conoce e pandemia di coronavirus, COVID-19. Na Aruba e prome casonan di COVID-19 a bira conoci den luna di maart di aña 2020 y pa dos aña largo e pandemia a afecta fuertemente comunidad di Aruba; y tres aña despues, apenas Aruba ta recuperando economicamente di e fuerte impacto aki.
44.044, esey ta e cantidad di caso di COVID-19 confirma na Aruba te aworaki y di e cifra aki, un total di 282 persona a perde e bataya contra e enfermedad aki. Aunke na Aruba e casonan di COVID-19 no ta wordo ofreci mas publicamente manera antes, e virus t’ey presente ainda. Y ultimo casonan registra, segun Organisacion Mundial di Salud (WHO) ta indica, tabata den e siman di 20 di februari di e aña aki, cu a conta cu 18 caso confirma. WHO ta indica tambe cu e cantidad di dosis di vacuna administra na Aruba ta 216.561.
Ayera Organisacion Panamericano di Salud (PAHO) a tene un conferencia di prensa conmemorando e di tres aña di e presencia di COVID-19 na mundo. Director di PAHO, Dr. Jarbas Barbosa a haci yamado na tur pais pa fortalece e vigilancia y purba cera e buraconan di cobertura di vacunacion pa asina por caba cu e emergencia y prepara pa crisisnan di salud cu por presenta den futuro.
Den e ultimo tres aña, e continentenan di America tabatin mas di 190.3 miyon caso di COVID-19 y mas di 2.9 miyon morto, cu ta conta pa 25% y 43% di e total mundialmente. Barbosa a remarca: “E pandemia a subraya cu ningun pais of organisacion na mundo tabata prepara pa e impacto di e pandemia aki.” Esaki ta inclui e continentenan di America cu ta marca pa desigualdad.
A pesar di e mehoracion y desaroyo, Barbosa a adverti cu COVID-19 t’ey ainda y cu e virus mester establece ainda den un patronchi predicible. El a agrega cu durante e ultimo luna, den e continentenan di America tabatin mas di 1.5 miyon di caso y 17 mil morto.
