Tres homber cu tabata falsamente acusa di asesinato na Merca a haya nan libertad despues di 36 aña di prizon. Alfred Chestnut, Andrew Stewart y Ransom Watkins a ricibi sentencia pa bida largo na 1984 pa mata un mucha homber di 14 aña di edad un aña prome.

A laga nan den libertad na Baltimore ora cu Hues a anula nan condena, despues di a revisa nan caso. E caso a habri bek ora cu Chestnut a manda un carta na unidad di Baltimore Conviction Integrity. El a inclui evidencia cu a descubri aña pasa.

E tres homber tabata adolescente ora cu a hiba nan prizon na november 1983, despues di e morto di DeWitt Duckett, kende a muri pa tiramento na su nek ora e tabata bayendo Baltimore Junior High School.

E hoben su morto a ricibi cobertura amplio den prensa. Tabata e prome tiramento na un scol publico na Baltimore. “E tres homber aki a haya castigo, ora nan tabata hoben, pa motibo di mal conducta di Polis y Fiscal”, segun abogado Marilyn Mosby a bisa despues cu e hombernan a keda den libertad.

Den un declaracion, el a bisa cu ‘detective a acusa e tres hombernan, tur color scur di 16 aña di edad, uzando coercion di otro testigo adolescente pa nan caso. Fiscal a bisa cu na inicio di e investigacion, Polis a ignora y sconde rapport di varios testigo cu a identifica otro persona como e asesino.

Tur testigo den e huicio awo a retracta nan evidencia, segun Mosby. “Mi no ta kere cu awe ta un victoria, pero un tragedia. Nos mester tuma nos mesun responsabilidad pa esaki”, Mosby a bisa. E otro sospechoso a muri na 2002.

Hues a seya tur documento di e caso, pero Chestnut a obtene nan aña pasa den un peticion publico di documento. Na un conferencia di prensa Watkins a bisa cu esey ‘nunca mester a pasa’. El a bisa cu nan pelea no a caba y ‘nan lo tende di nos atrobe’.

Mosby a anuncia cu lo cuminsa cu programa nobo, ‘Resurrection After Exoneration’, pa provee servicio pa yuda personanan exonera di crimen pa integra bek den sociedad, incluyendo sosten pa educacion, salud fisico y mental.

El a bisa cu estado di Maryland no tabatin legislacion pa guia compensacion pa esunnan cu condena falsamente di un crimen, anto lo traha pa cambia esey. Actualmente e ‘Board of Public Works’ tin autoridad pa dirigi compensacion.

 

LEAVE A REPLY

Please enter your comment!
Please enter your name here