(AFP)—Presidente di Merca, Donald Trump, a bisa diaranson cu e no lo firma un ley di vivienda importante si Republicanonan den Congreso no aproba rapidamente e reforma electoral cu e ta buscando, aumentando un conflicto cu su propio partido prome cu eleccion di medio termino.
Pa varios luna caba, Trump ta exigi aprobacion di SAVE America Act, un pakete di medidanan cu lo impone limitacion nobo y estricto riba eleccion, incluyendo un rekisito pa tur votador mustra prueba di ciudadania ora nan registra pa vota y identificacion cu potret ora nan entrega un voto.
Den su empeño pa logra aprobacion di e reforma — critica pa Democratanan como un atake contra derecho di voto — el a cancela loke Republicanonan tabata sperando lo ta un momento politico positivo: un ceremonia publico cu Trump y enfoca riba e asunto importante di costo di bida.
“E conferencia di prensa y firma di Ley di Vivienda di awe ta cancela te ora cu nos aproba e SAVE AMERICA ACT cu nos mester desesperadamente, cual mi ta considera un Emergencia Nacional,” Trump a publica riba su plataforma Truth Social, apenas dos ora prome cu e evento na Capitol di Merca.
E medida di reforma electoral ya a fracasa den Senado, y criticonan ta bisa cu esaki ta un esfuerso evidente pa suprimi votacion den comunidadnan cu generalmente ta faborece Democratanan.
Pero Trump, kende ainda ta reitera su afirmacion falso cu el a gana e eleccion di 2020, repetidamente a exigi aprobacion di e ley, hasta mientras lidernan Republicano ta splica cu tin poco posibilidad cu e lo pasa den Senado debi na reglamentonan di e camara y falta di apoyo di algun senador Republicano.
Aunke el a cancela e ceremonia di firma diaranson, e presidente a bay Capitol Hill pa reuni cu Republicanonan den Senado durante ora di almuerzo.
Mientras e tabata canando cu lider di mayoria den Senado, John Thune, Trump a ignora practicamente preguntanan di reporteronan tocante si e lo firma e ley di vivienda.
En cambio, sin ser pregunta, el a bisa cu e “guera” den Medio Oriente “ta andando hopi bon” y cu “Iran ta haciendo concesionnan hopi grandi”.
Diamars atardi, cuatro senador Republicano — consciente di e impacto politico di e guera den un aña electoral — a reuni cu Democratanan pa aproba un resolucion cu ta obliga Trump pa termina e guera of busca autorisacion di Congreso pa sigui cune.
‘Importancia menor’
E ley nobo di vivienda a ser aproba diamars cu amplio apoyo bipartisano, incluyendo apoyo fuerte di Republicanonan den Congreso cu a presenta esaki como un logro importante den e lucha contra costo halto di bida prome cu eleccion di november.
E ley ta enfoca riba aumenta oferta di vivienda, suavisa reglamentonan di construccion y amplia acceso na posesion di cas, mientras huur halto, costo di hipoteca eleva y escasez di casnan a bira preocupacionnan politico importante.
Trump anteriormente tabata apoya e pakete, ya cu esaki tabata destina pa mustra su lucha pa baha costo di bida memey di inflacion persistente parcialmente impulsa pa e guera.
Pero diaranson el a keha cu e ley ta di “importancia menor” y cu “no por compara” cu aprobacion di SAVE America Act.
E rechaso di Trump pa firma e ley por ta solamente un señal politico. Bao di Constitucion di Merca, si e presidente no firma un ley dentro di 10 dia mientras Congreso ta reuni y tampoco no a pone veto riba dje, e ta bira ley automaticamente.
Siman pasa Trump a cancela e audiencia di confirmacion den Senado pa su candidato pa director di inteligencia nacional, argumentando cu e ley electoral tabatin prioridad.
Partidarionan di e medida ta kere cu esaki lo fortalece seguridad electoral na Merca. Pero aunke 14 estado no ta exigi ningun forma di identificacion pa emiti un voto, incluyendo California y New York, fraude electoral ta extremadamente incomun.
Criticonan ta señala cu ya ta ilegal pa hende cu no ta ciudadano vota den eleccion di Merca, y ta expresa preocupacion tocante e obstaculonan cu ta siendo crea y cu por viola e derecho di voto di miyones Mericano.
Hopi organisacion ta adverti cu hende di gruponan minoritario ta esnan cu ta mas afecta pa e tipo di restriccionnan aki.
