Director di Citgo, Raymond Buckley a laga sa cu nan tin atencion na e problema di asbest den tereno di e refineria.  Nan ta den discusion cu gobierno ya cu Citgo ta siguiendo e regulacion cu gobierno tin riba asbest via DTI.

E regulacion aki a bini den e periodo cu e refineria no tabata den operacion. Awor Citgo ta den discusion cu e instancia di gobierno riba con nan ta bay maneha for di un punto di bista industrial den caso cu eventualmente nan lo por topa cu asbest ariba tereno di operacion di e refineria.

Durante un entrevista cu Al Hits 100 FM, e director di Citgo a bisa cu den situacion cu e refineria ta actualmente den su proceso di renobacion y restart, no tin asbest. Mayoria di e planta di e decada di añanan 40, no t’ey mas. Tin un parti grandi cu no a wordo restart mas y nan a wordo desmantela. E planta mas bieu actualmente ta data di decada di aña 70 bay padilanti.

E  asbest cu ta data for di basta aña caba y cu a wordo uza den pasado den e mesun instalacion y operacion di e refineria,  tur e material aki ta esun cu e operado anterior Valero a remove a base di un acuerdo cu gobierno prome cu Citgo a tuma over. Sr. Buckley a indica cu inicialmente tabatin un acuerdo cu Valero pa asigna  un tereno unda e asbest aki a wordo deposita.  Tambe el a indica cu semper nan tin cierto procedura cu nan ta uza si den caso nan ta yega na cierto area cu kisas tin asbest y con nan ta manehe. Sinembargo nan ta den combersacion cu gobierno riba e punto aki.

Bon Dia  Aruba a dedica basta atencion riba e asunto aki, considerando cu habitantenan di Lago Heights a yega di protesta pa e menasa di asbest aki y e peliger cu esaki por nifica pa salud di hende. E dispute ainda no a haya niun atencion di gobierno, ni di Citgo y awor e habitantenan ta den corte pa busca nan derecho.

Igualmente e corant aki a yega di papia cu director di WEB riba e tereno supuestamente contamina unda nan a bin cu un proyecto di parke di pannel solar na Sero Colorado. Sinembargo e director di e compania di utilidad, Luis Oduber a laga sa cu nan a contrata un compania pa haci un estudio di e tereno; y nan no a detecta niun sorto di contaminacion.  Alomenos ni riba superficie ni bou tera na profundidad di dos meter.  Sinembargo WEB mester a para e actividad pasobra no tabatin e permiso pa construi e parke, manera Bon Dia Aruba a skribi. Tambe un habitante y ex trahado di Lago a confirma cu e tereno ey ta contamina. E ex trahado mes a traha e tempo ey riba e parti tereno ey.

Sr. Buckley a bisa cu e refineria tin 3.8 miyon meter cuadra cu Valero a yega di pasa na pais Aruba bek y cu ta wordo maneha pa e compania estatal Refineria di Aruba (RdA).  E tereno aki tin un area cu Citgo ta opera y otro ta na man di RdA. Un parti di RdA su area ta esun cu a wordo uza pa e proyecto di pannel solar di WEB; pero e ta un proyecto cu Citgo no tin nada di haber cu ne. Pero si e refineria ta responsabel di e siguridad completo di e tereno. P’esey nan a yega na un tipo di acuerdo of protocol cu RdA y WEB riba maneho di e parti aki.

Nafta y campamento
Igualmente el a referi cu nos isla ta gosa di tur e infrastructura necesario pa barco grandi por yega na e terminal aki pa haci un bon transhipment, unda tambe nos ta importa combustibel manera gasolin, jet fuel, diesel, kerosin, etc.. Te hasta e barco mas grandi di mundo a haci uzo di e infrastructura aki. Tin clientenan den pasado cu a yega di bin cu 2 pa 3 miyon bari den e barco aki pa haci un transhipment haciendo uzo di e tankinan di e refineria.

Considerando cu e crudo cu lo wordo mehora den e refineria di Aruba ta un crudo basta pisa cu ta bin for di area di Orinoco di Venezuela, Citgo mester haci uzo nafta pa dilui e crudo aki y bin cu e producto mas mehora. Di cada 4 bari di crudo pisa nan mester un bari di nafta; pero e bari di  nafta cu ta bin Aruba ta wordo hib’e bek na Venezuela, unda e por wordo uza atrobe. E uzo di e nafta aki ta añadi balor; ya cu e ta rindi e cantidad di bari inicial cu casi un bari extra, locual ta nifica mas bari den produccion.

Igualmente el a laga sa cu recientemente nan a basha e prome fundeshi unda lo wordo lanta e campamento pa e trahadonan cu lo bini di afo den e refineria. E plan ta pa lanta e campamento aki den e mesun localidad unda e campamento aki a yega di aloca e trahadonan Turco y Filipino cu a yega di bini den pasado. Sr. Buckley a laga sa cu nan lo cuminsa cu 400 camber pa trahadonan  local como esun prome y despues di e region.

Boramento
Bon Dia Aruba a ricibi un tip cu tin boramento riba e tereno actualmente. Pakico esaki ta tumando luga no ta conoci y nos lo bay investiga. E parti di e tereno unda a dump e asbest ilegalmente den subsuelo, ta den desaroyo ainda. Gobierno y Citgo a bay di acuero pa bin cu mas dump den e area aki, aunke esaki ta contra ley vigente. Un parti di e tereno ta pa Citgo por uza como dump y e otro gobierno tin e plan pa dump sushi di cas.