(AP) – Turkia su corte top riba diaranson a rechasa un peticion pa anula un ley controversial diseña pa kita miyones di cacho for di caya, cual criticonan ta bisa a resulta den asesinato di e bestianan.
E partido den oposicion a busca manera di anula e legislacion cu a keda implementa aña pasa, argumentando cu esaki ta den violacion di derechonan humano di bestia y e derecho na bida. E Corte Constitucional sinembargo, a dicidi cu e provisionnan ta legalmente valido y pa sigui implementa esaki.
Decenas di activista pa derechonan di bestia a reuni cerca di e Corte Constitucional pa pusha e corte anula e ley, wantando poster den protesta y gritando lema contra e gobierno.
E gobierno a calcula cu mas o menos 4 miyon bestia ta riba cayanan di Turkia su ciudadnan y demas partinan. Mientras cu varios di e cachonan aki no ta causa daño, e gobierno a tuma accion pa fortalece e legislacion tocante bestianan riba caya, despues di incidentenan di atake di cacho, incluyendo casonan cu ta involucra muchanan.
E ley aki ta rekeri municipalidadnan busca e cachonan aki y reloca nan den shelter unda nan lo haya nan vacuna y haci tur preparacion pa nan bira disponible pa adopcion. Lo pone e Cachonan cu tin dolor, tin malesa terminal of ta posee un riesgo di salud pa ser humano drumi.
Esnan cu ta stima bestia ta den oposicion fuerte di e ley, cu miedo cu esaki lo resulta den e practica amplio di pone cachonan drumi of cu nan lo termina den shelter abruma.
Tambe nan a trece dilanti preocupacionnan tocante con e municipalidadnan cu ta den problema financiero lo haya e fondo necesario pa construi e shelternan adicional. Nan tin miedo cu, na luga di reloca recurso pa e cuido di e cachonan aki, algun municipalidad lo prefera pone nan drumi bao e pretexto di malesa.
Varios defensor di derecho di bestia tambe ta acusa cu varios di e bestianan aki a ser mata despues di a aproba e ley.
E decision di corte probablemente lo aumenta presion riba e municipalidadnan pa aplica e ley.
