Durante un conferencia di prensa diabierna pasa cu Fundacion Anti Droga Aruba (FADA) a ofrece pa e medionan local, a ser conoci un programa nobo cu cual e fundacion lo cuminsa, yama B-Smart, asina como tambe un desaroyo di investigacion cu Glenn Sankatsing, director di Caribbean Reality Study Center lo haci na Aruba tocante adiccion di droga y alcohol.

Rulienne Arends, trahado preventivo di e fundacion, a splica tocante e programa nobo B-Smart. El a bisa cu a haya esaki di parti di e isla Boneiro, eynan ta aplica e programa specialmente pa muchanan y hobennan den scol.

Originalmente, el a expresa cu e programa tin bin for di Hulanda, despues Boneiro a adapta esaki y awor lo bay adapta na Aruba. E ta consisti di cuater topico, como por ehempel: Droga, humamento, alcohol y tambe e parti di weganan di internet, cu ta un adiccion nobo.

Arends a señala cu e team di FADA a haya recientemente un entrenamento special di parti di Christine Alvarez di Mental Health Caribbean (MHC), cu a bin di Boneiro pa asina ora e scolnan habri bek na september, nan lo cuminsa cu e ocho scolnan piloto pa loke ta e programa B-Smart.

Lo implementa e programa aki na seis scol di SKOA y tambe di SVCOA, cu tin dos scol pa loke ta e programa piloto, Arends a sigura.

Di mesun manera, el a informa cu e intencion di esaki ta pa mustra e muchanan, a traves di e programa aki, varios situacion cu nan ta topa cune diariamente y kico nan por haci pa por resolve e situacionnan ey, of con nan por deal cu e parti di amistad y famia.

E implementacion di e programa lo bay ta un bes pa siman parti den un luna, unda cu e hobennan no lo bay haci na scol so, sino cu tambe lo tin tarea pa haci den na cas, hunto cu nan mayornan, pa nan tambe por involucra den e programa aki.

Ademas, Arends a manifesta cu e programa a haya fondonan di Ministerio di Deporte, Salubridad y Turismo, asina como tambe sosten di Ministerio di Asunto Social y Labor cu e Crisis Plan Social. FADA ta spera cu lo cuminsa cu e ocho scolnan piloto, y unabes cu esey keda cla, lo cuminsa na tur scol basico di Aruba.

Glenn Sankatsing, Director di Caribbean Reality Study Center, centro di investigacion Arubiano cu tin mas di 20 aña di experencia den investigacion, a duna di conoce cu adiccion na Aruba ta causa hopi insiguridad y problemanan social den comunidad.

Sankatsing, kende ta e investigado principal di e proyecto, a sigura cu e situacion a bira pio. “Nos ta mira famianan kibra,un impacto negativo riba e educacion di generacion nobo y daño na nos productividad laboral.”

Di mesun manera, Sankatsing a bisa cu e delaster investigacion nacional riba e impacto social di droga na Aruba a tuma luga 22 aña pasa, y ainda e ta uza frecuentemente; pero e situacion a cambia y a bira mas problematico, pa motibo cu no tin problema di adiccion bou control. Esaki ta causa cu ta existi un necesidad pa haci un investigacion nacional actualisa y mas amplio, pa bin cu programa y metodo efectivo.

Sankatsing a anuncia e inicio di e investigacion nacional ‘Uzo problematico di droga y alcohol na Aruba’ bou di e Centro di Investigacion Caribbean Reality Study Center, cu lo involucra tur stakeholder pa tereno di droga y lo tin cooperacion estrecho cu tur organisacion cu tin di haber cu efectonan negativo di abuso di substancia, cu prevencion, rehabilitacion y resocialisacion.

E investigacion lo identifica factornan di riesgo cu ta laga un persona bira un uzado problematico di droga of alcohol y cu laga cay den adiccion y aislamento social.

E prome fase tin dies investigacion, pa haci un diagnostico riba e uzo problematico di droga y alcohol. Di dos fase tin shete investigacion, cu ta studia e clientela di cinco organisacion rond di Aruba pa identifica e situacion di vulnerabilidad y riesgo, e resultadonan combina lo duna un bista pa por bin cu un accion concreto.

Finalmente, e resultado lo wordo presenta den un aña na tur instancia di gobierno y priva pa asina por haya feedback pa ofrece un strategia y programa di accion practico cu tin e obhetivo di promocion di salud.