Marlon Croes, director di DOW

ORANJESTAD – Director di DOW, Marlon Croes a bisa cu como organisacion, nan no ta mete den operacion di e companianan chikito cu ta brindando nan servicio na e departamento aki.

Pero tin algun di nan cu no ta cumpliendo cu e acuerdo firma, y kehonan contra nan ta drentando, cu a haci cu DOW ta bay reforsa e contracto cu nan tin cu e companianan aki. Ta asina cu nan tin cu cumpli cu entrega di cierto documento mensualmente.

DOW a bin cu un maneho di “not work not pay” cu e contratistanan chikito cu ta ofrece nan servicio pa realisa trabounan chikito pa nan. E maneho aki ta pa exigi nan pa cumpli cu tur documento exigi. Asina aki nan por haya trabou bek for di DOW y tambe nan respectivo pago pa e trabou realisa. Segun Croes nan a bin cu e maneho stricto aki pa protege e contratistanan chikito, empleadonan y DOW mes como organisacion.

Na october aña pasa, esaki a keda oficialisa publicamente caminda DOW a duna te fin di december ultimo pa nan cumpli cu tur rekisito. E ta lamenta cu no tabata tur contratista a cumpli, y nan a dicidi di extende te januari 2019, unda mas hende por a cumpli. Sinembargo nan a dicidi di extende e periodo pa fin di februari ultimo.

Pa e fecha ey un 25% di e contratistanan tabata falta pa cumpli cu entrega di e documentonan exigi. Pero pa diahuebs ultimo el a baha te cu un 10%. Esaki ta un señal cu mayoria di e contratista aki ta cumpliendo cu e condicionnan poni preto riba blanco.

“Nos tur tin cu cumpli cu nos obligacionnan,” el a declara. Director di DOW kier a bin cu e aclaracion aki pa reacciona riba cierto publicacion cu a sali den medio di comunicacion.

Segun director di e departamento aki, Marlon Croes, nan a firma un contracto nobo tres pa cuater aña pasa. E tabata un contract di 5 aña, unda a wordo specifica diferente punto di ‘mehoracion.’ Pa nan cumpli cu e compromiso aki, DOW lo haci control riguroso saliendo for di e punto di bista cu e companianan aki lo cumpli cu loke a wordo acorda. Sinembargo nan ta ripara cu esaki no a sosode.

El a trece dilanti cu entre otro den e contract aki tabata stipula cu cada tres luna e contratistanan tabatin e compromiso di entrega nan documentonan cu ta demostra cu nan a paga belasting, obligacion social y salario di e empleadonan. Nan ta ripara den e delaster añanan cu algun di e contratistanan ta bay haya beslag di mey miyon te cu 1 miyon florin. Tambe DOW ta bin hayando keho di e trahadonan mes di e contratistanan debi cu nan no ta wordo paga di acuerdo cu ley laboral.

E companianan aki ta haci trabou riba caya, entre nan corta yerba cant’i caminda, limpiesa riba sitio publico y cuida nos facilidadnan di scol, parke, etc… Tambe DOW tin cierto team cu ta traha den mantencion di rooinan y canal di awa pa prepara nan pa temporada di awasero. Igualmente e grupo cu ta traha pa mantencion di asfalt.