editorial.jpg

Na su yegada despues di otro biahe pa Houston, nos por a scucha un ministro encarga cu Asunto Economico y Energia riba un tono triunfante conta con fantastico e negociacionnan cu Citgo a bay. 

El a conta cu trabaonan na e refineria ta cuminsa pronto y cu e inversionnan lo abarca un suma di sigur un biyon dollar. Naturalmente e periodista cu ta haci e entrevista ta lubida di puntra ta ken ta bay pone e biyon ey riba mesa. Nos como pais ta bay fia? Pasobra un compania nobo, 100% propiedad di Pais Aruba, no ta haya niun cen fia, sin cu e pais ta para garantia. Otro biyon pa nos fia, y ningun hende ta puntra nada, pasobra oposicion tambe ta encanta un refineria den operacion?

Pero ban purba descifra e ‘business model’ di cual nos ta papiando awor. Nos tin un refineria bieu y incompleto, cu awor por produci producto intermedio so. Loke Citgo y PDVSA ta desea pa nos haci ta, haya/cumpra e refineria di Valero, rehabilita e instalacionnan riba nos gasto, pa nan por uza esakinan pa procesa crudo, pa produci nafta, pa por transporta esaki pa Venezuela pa uza como diluyente pa e crudo pisa di Orinoco. Di e forma aki ta percura pa haya un crudo miho y cu si por bende riba Mercado internacional. Kico ta haci cu resto di e proceso na Aruba ta un pregunta riba cual nos no a mira un contesta ainda. En todo caso no ta bay tin produccion di otro productonan final cu Aruba mester, manera gasolin, diesel, jet fuel y kerosin. Tur eseynan lo mester keda cumpra y importa for di exterior.

Ta papia tambe di e cambio di fuel oil pa gas natural den forma likido (LNG) como   combustibel den e proceso di destilacion. Esey ta un posibilidad di cual e rendabilidad ta depende di e volumen di consumo. Si esey no ta grandi bastante, e inversionnan haci den e instalacion di LNG no por ser paga riba un termino rasonabel. Un bentaha cu esaki por tin ta cu lo por laga WEB tambe cambia di heavy fuel oil pa LNG. Den un articulo di Reuters na December di 2013, unda a raporta encuanto e negociacion entre Valero y PDVSA e tempo ey, tabata papia di un start up di parti di e refineria, cu uzo por ehemplo di un ‘delayed coker’ so. E pregunta ta awor si mester start up henter e planta pa probecha e maximo ‘throughput’ cu e tin, sino no ta bale la pena mes cuminsa cu LNG. Y si no ta cambia pa LNG, e storia di un refineria ‘berde’, si acaso tabata existi tal cos, ta caba ey mes.

Tambe ta importante pa tene na bista loke ta pasando riba mercado internacional. Mester tene cuenta cu nos ta bay inverti masha hopi placa den un refineria, esaki exclusivamente pa traha un producto intermedio, cu ta mara nos cu man y pia na e unico nan cu ta interesa den esaki: PDVSA y Citgo. Realmente loke ta interesa nan ta nafta na un prijs cu ta cumbini. Manera e situacion riba mercado di petroleo y producto petrolero ta, lo dura talbes varios aña prome cu prijsnan lo subi na $50 pa bari di crudo y consecuentemente prijs di nafta riba Mercado tambe lo ta abao. Anto nos, memey di e situacion aki, ta bay haci inversion biyonario, pasobra nos tin un partner permanente cu ta hasta dispuesto pa paga mas pa nafta cu nan mes ta produci, en bes di cumpra esaki riba mercado? Pero ta nos ta sinta cu un inversion cu mester amortisa, cu ademas nos a aumenta dor di inverti den LNG? Ta nos ta sinta cu e capital inverti cu dificilmente por bolbe pa nos den un mercado asina. Si pa un motibo of otro surgi un problema cu Citgo of PDVSA, nos ta sinta cu un refineria cu no ta produci nada cu por bay mercado directamente, y en realidad nos ta ‘back to square one’ cu e refineria den e situacion cu nos tabata ora el a cera na 2012. Sigur den e prome añanan cu ta bin, cu un prijs di crudo hopi abao, e gran pregunta ta si e planta aki lo por produci nafta na un prijs competitivo y rendabel, pa por garantisa nos un lease cu ta alcansa pa amortisa e gastonan halto di inversion haci pa Pais Aruba. Binti aña of mas ta hopi tempo pa funciona como upgrader pa un compania cu por haya alternativa mas barata. Pa no papia mes di e hecho cu Venezuela ta trahando riba mas upgrader den region di Orinoco mes, loke pa nan lo baha gasto di upgrading.

Atrobe nos ta yega na un cantidad di pregunta, cu ta exigi contesta concreto, en bes di e storianan fantastico di ministro de Meza. De paso e por contesta e pregunta con e ‘business case’ pa fiamento di e suma astronomico ta, di un pais cu tin caba cinco biyon di debe publico pa enfrenta den e proximo binti y pico aña. Palabra ta na e ministro.

 

 

LEAVE A REPLY

Please enter your comment!
Please enter your name here