Nos ta bay den direccion di un eleccion excepcional, y esey pa varios motibo. Esaki ta e promer eleccion despues di e crisis mas grandi cu nos mester a pasa aden. Nos ta saliendo di e crisis di salud, pero pa hopi aña nos lo sinti efecto di tur loke mester a haci pa yega unda nos ta awor. Esey ta haci extra importante pa nos sa ken y con ta dirigi e pais aki den e proximo añanan. Si nos ta considera tur e añanan anterior como un antesala di ‘tryout’ anto di awor en adelante no tin espacio pa pifia mas. Un cambio radical mester tuma lugar den e cultura di gobernacion y esnan cu tabata den pasado parti di e problema, por dicidi cu nan ta bay ta parti di e solucion, si of no.

Mientras tanto, nos ta casi libra di e virus, loke ta duna un poco mas aliento. Aunke e noticia cu dos persona riba e promer crucero cu a yega Aruba tabata contagia cu Covid-19, mester sirbi di advertencia cu nos no por relaha nos vigilancia. Esey ta conta pa e autoridadnan concerni, pero tambe pa nos como ciudadano. Cu cierto asombro nos ta sigui e discusionnan riba rednan social, unda persona pro mantene tapaboca y otro medida di higiena ta cruza spada cu esnan cu ta haya cu, pareu cu gobierno a tuma e decision pa kita e medidanan general manera toque de queda y otro restriccion, esey lo tabata e señal pa laga tur cos bay. Realmente e asunto ta masha simple: si tin organizacion o negoshi cu kier mantene uso di tapaboca y distancia social den nan lugar, esey ta nan pleno derecho. Esun cu no gusta bay shop otro caminda.

Pero tin mas cos andando. E campaña aki a confronta nos tambe cu e hecho cu finalmente nos mester cuminza traha sistematicamente riba renobacion di nos leynan. Loke a mustra nos riba esey ta e reclamo di un ciudadano cu a critica e violacion di tratado cu e dunamento di dato di tur ciudadano cu ta vota na e partidonan politico cu ta desea esakinan, ta encera. Nos a comprende cu ya tin un consulta andando pa no solamente keda sin duna e adresnan na e partidonan, pero cu ta considera cumpli completamente cu e tratado y no duna e partidonan ningun dato mas. Esaki tambe pa e consideracion cu e partidonan no mester colabora mas den yuda ciudadano cu informacion si nan ta riba lista di votador si of no, pa seguidamente yuda nan cu nan reclamo. Esaki cada ken por hacie via e database di Censo, y e informacion cu ta sali ta solamente di e persona concerni. Si mester bin un decision cu no ta duna informacion mas na e partidonan politico, esey lo mester ta un anuncio formal di Promer Ministro, y esaki lo por ta cualkier momento. Esey lo ta bon pasobra duna tur dato menos adres ta un mitar medida, di cumpli ‘un tiki cu tratado’ y cumpli ‘un tiki cu ley local’, cu consecuencia cu finalmente nos no ta cumpli cu ningun. Den e cosnan aki mester tuma paso radical y den e asunto aki mester cumpli cu e regla legal di orden mas halto, y esey ta e tratado.

Otro fenomeno ta e caso di e ex-ministro deteni, den cual nos por imagina cu su detencion ta bay pa largo, esta pa 60 dia despues di e actual periodo. Mester bisa cu esey ta algo cu su propio abogado a anticipa, pero huez comisario no a dicta asina, ainda. Si esaki sucede, e lo ta riba su mes e proximo paso logico, cu no lo tin absolutamente nada di haci cu manipulacion di parti di ningun politico. Abogado di e sospechoso tabata presente semper segun ley ta prescribi durante e proceso di interogacion, y ta a base di loke ambos partido ta trece dilanti huez comisario ta tuma un decision. Esnan cu nunca a presencia e tipo di caso aki, no por sa cu cuanto cautela ta trata e asuntonan aki. Ta absolutamente innecesario pa nos mes como ciudadano cuminza crea duda den nos sistema hudicial, sin cu tin un base pa esaki. Manera nos a trece dilanti na varios ocasion, e proceso hudicial tambe ta trabao di hende, pero e tin, contrario na otro parti di nos gobernacion, su ‘checks and balances’. Pues ora tin claramente fayo den e sistema, mester critica y si acaso necesario, denuncia esey. Envez di basha tur tipo di critica riba e sistema, lo ta mas efectivo purba reflexiona riba kico ta pasando na e pais aki. Un pregunta concreto: ki dia nos a yega di tende, den historia reciente, cu tin tres (ex-)ministro bao sospecho hudicial y/o condena caba pa crimen grandi. Den tur tres caso ta trata di, segun Ministerio Publico, di crimen organiza, pa cual ta indica e anterior mandatarionan como cabez di e organizacion delincuente. Nunca antes tabatin tanto criminalidad na e nivel mas halto di nos gobernacion, y no di ‘kruimeldief’. Y den tur e debatenan cu tabatin nos ta asina ‘beleefd’y discreto cu e preguntanan al caso no ta bin dilanti? Nos ta sigui papia netchi asina di mehora enseñanza o salud publico, y nos no ta atende e tema aki, cu ta toca e propio raiznan di nos estado di derecho?