Pic1.JPG

Gobierno ta admiti cu e bario di Piedra Plat no a ricibi mucho atencion e ultimo añanan aki y p’esey nan ta orguyoso di anuncia inicio di e di tres fase di un proyecto di embeyecemento cu tin 7 aña den planificacion den su totalidad.

Siman pasa a habri y haci un apertura di facilidad nobo MFA Paradera y awor tin mas plan pa e bario aki. Awor despues di un gran cantidad di inversion cu a tuma luga segun minister Otmar Oduber di Turismo, Transporte y Cultura cu tabata presente durante un evento ayera, unda tiendanan a habri como tambe stacion di gasolin cu lo tin pronto na Paradera, awor lo cuminsa haci renobacion na Piedra Plat mescos cu otro barionan rond di e isla. E mandatario ta asina envolvi como cu tin un gran afiliacion cu e bario.

Anthony Thiel di compania BIC lo ta encarga cu e tercer fase di e proyecto aki tambe cu lo continua te na entrada di Santa Rosa unda cu e bario di Piedra Plat ta termina. Un inversion di 5 miyon florin a wordo haci pa e proyecto di  y embeyecemento na e bario di Piedra Plat cu ta inclui un rotonde nobo dilanti di Bright Bakery, klinkers y area di parke pa cana y haci ehercicio mescos cu na Linear Park. E ta un proyecto hopi interesante segun sr. Thiel di cual nan ta bay cuminsa traha riba dje den temporada di Pasco anto e ta bay wordo ehecuta den dos fase.

Esaki ta pa tene na cuenta pa no crea inconveniencia na e usuarionan di e camindanan mirando cu tin hopi cos den e area incluyendo entre otro Juliana School cu awo a muda temporalmente pa na Piedra Plat. Ta bay tin facilidadnan pa bicicleta cu lo wordo traha como tambe trottoir pa hende cana.  Ta bay percura tambe pa un bon sistema di drenahe di awa como tambe un patio di recreo, sistema di irigacion, landscaping hunto cu su bakinan di mata. Esaki lo ta mas o menos 4 luna di trabao.

 

Proceso a tarda

Minister Otmar Oduber ta splica Bon Dia Aruba cu: ”E proceso a dura un poco prome cu nos a confirma e fase aki riba prioridadnan cu tabata tin den e bario. E presupuesto ta di aña 2016 anto e proyecto a wordo aproba den luna di mei di e aña aki unabes e decision a wordo tuma pa e trabaonan wordo haci door di DOW” A inverti 3 miyon florin caba den e proyecto aki for di fondo di presupuesto 2016 anto segun e mandatario den e presupuesto 2017  ta bay tin e otro mita di e fondonan (2 miyon florin) pa por termina e proyecto aki te na Santa Rosa.  

 

Homenahenan

Conseho di Minister a aproba e peticion di nombramento di e caya for di e rotonde di Paradera te na locual lo bira e rotonde dilanti di Bright Bakery, pa carga e nomber di Alfonso ‘Buchi’ Boekhoudt. Esaki ta un homenahe na un persona cu ta contribui hopi na nos cultura na Aruba. Buchi ta claba caha di orgel y ta conoci manera un pionero di steelpan desde momento cu nan a introduci esaki na Aruba. Buchi a lanta na Paradera anto e ta un persona di edad cu ta dedica hopi di su tempo mes na traspasa e conocemento cu e tin y e cultura di loke ta caha di orgel anto locual e ta significa pa nos aki na Aruba.  

 

For di e rotonde nobo cu lo bin dilanti di Bright Bakery te cu e rotonde di St. Cruz, esaki lo carga e nomber di Caya Harry Bareño cu a lanta Bright Bakery anto cu no ta na bida mas. Sr. Bareño a contribui hopi den comercio y desaroyo specificamente den Piedra Plat, como tambe den Paradera den su totalidad. Manera e veld di Britannia y otro desaroyonan na e bario.

 

LEAVE A REPLY

Please enter your comment!
Please enter your name here