Congregacion di ‘Hermanos Maristas’ di Chile a presenta un denuncia na fiscalia, contra un sacerdote cu ta acusa di abusa sexualmente di 14 mucha menor di edad, na dos scol, cu ta pertenece na e orden religioso aki, desde añanan 70. E denuncia a ser presenta dialuna pa e congregacion aki, cerca fiscalia di Santiago, caminda a ricibi e keho y cu awor ta den analisis, fuente di e congregacion Marista y ministerio publico a confirma.
Abel Pérez Ruiz, sacerdote, a confesa na aña 2010 cu e tabata autor di varios abuso durante 30 aña na dos scol di Santiago de Chile. Siete aña despues, e congregacion di sacerdote a dicidi di denuncia henter e suceso aki na autoridadnan, despues cu dos victima a dicidi comenta tur cos tocante e abusa cu nan a pasa aden.
Den un comunicado e grupo Marista a reconoce e suceso y nan a duna un informe pa maestronan di varios scol, den cual nan ta reconoce tur crimen cometi pa e sacerdote Perez Ruiz. Nan a bisa : “Cu hopi dolor, nos kier comunica e suceso di abuso sexual cu un religioso di nos congregacion a comete contra varios mucha.”
Despues cu Perez Ruiz a acepta tur su delitonan, el a ser separa di tur actividad cu mucha y el a ser hiba na un residencia di e congregacion na Peru, medionan local a informa.
Den ultimo añanan, mas di binti sacerdote a keda acusa di pederastia na Chile, y mas di cinco di nan a haya un condena di banda di husticia local, situacion cu a origina un rechaso di henter sociedad cu ta sigui iglesia catolico.
Un di e ultimo casonan ta e suceso cu tuma lugar cu un sacerdote di Irlanda, John O’Reilly. El a ser expulsa di Chile na luna di mei, despues cu el a ser condena pa cuatro aña di libertad vigila, pa motibo cu el a abusa sexualmente di un mucha menor, na un colegio di e congregacion di ‘Los Legionarios de Cristo’.
E caso di Perez a sali na luz publico cinco luna prome cu e bishita di Papa Francisco na Chile. Francisco lo bishita ciudadnan di Santiago, Temuco y Iquique.
