14Jul,JO,Faro (1).JPG

Sr. Romulo Fingal ta splica Bon Dia cu e ta hopi contento cu e renobacionnan nobo haci na Faro y cu e ta spera cu e historia sigui pasa di generacion pa generacion pasobra esaki ta algo hopi bunita pa locual ta desaroyo y historia di nos isla.

Sr. Fingal ta splica Bon Dia cu na 1915, a huur buriconan di carga di Figaroa di Noord pa yuda traha e Faro na Westpunt. ”Pues e burico mester bay fe waf na playa te na Westpunt cu e carganan, palo, cement tur e cosnan aki. E tempo ey ta asina cos a cuminsa te ora cu Aruba a haya su prome truck, esaki ta cosnan pa sinta refleha ta con e hendenan por a haci esaki anto haci asina un tremendo trabao tambe” , Sr. Fingal a bisa. ”Den e tempo ey como mucha esey no tabata un luga pa hende traha, e tabata masha fastioso pasobra ta blo cabrito cu coneu y burico tin eybandanan e tabata masha solitario. No tabata tin ningun hotel ni ningun caminda pa yega eynan, no tabata tin caminda pa bay Noord tabata tin solamente un berea di burico cu cabay, eseynan so por a yega. ” Sr. Fingal ta splica

”Ta asina cu na 1939, mi a nace na e cas na Faro y mi tata tabata e ultimo “Vuurtorenwachter” te cu na 1962 unda cu el a bay cu pensioen. Despues di eynan, nan a manda waya di coriente te na halto ,anto segun historia e luz mes nos no por a hay’e pasobra nan a baha esaki y despues di hopi aña mi a haya tende cu e ta den museo di trein na San Nicolas unda nos a topa cu e lens masha special aki, cu ora cu e luz dal den dje, e ta bay 30 KM leu te den lama” Sr. Fingal ta conta Bon Dia.
 
Faro tin un historia largo y hopi interesante

E motibo pakico a traha Faro segun Sr. Fingal tabata ta for di e dia cu e barco di California a dal kibra eytras den scur. Na 1913 a bay un peticion di Aruba, pa Curaçao pasobra Curaçao tabata manda riba tur cos e tempo pa construi un Faro na  Westpunt anto e gobernador di Curaçao a contesta Aruba pa bin bek na aña 1915 cu un plan bon detaya. ”Durante di e prome guera mundial 1914 pa 1918, mester a warda pa e luz wordo transporta Aruba pasobra el a wordo traha na Francia. E tempo ey no tabata tin coriente anto e luz ta hopi interesante pasobra e ta draai cu farolin cual ta un sorto di kerosin cu e avionnan ta bula cun’e, e ta un kerosin limpi. ” Sr. Fingal ta bisa.

Tin algo hopi interesante cu Sr. Fingal a haya sa di e Faro despues di tanto investigacion cu ta obtenibel den su buki ‘Historia di faro na Westpunt’ unda e tin masha hopi detaye cu el a haya documenta. ”Mi a bin haya sa cu e haltura di faro tin di haber door cu no tabata tin coriente ,tambe tin di haber cu e holoshi. E ta un waya di staal largo for di caminda e luz ta, bao di e luz na halto den e cabes mas na halto ta colga na un peso, un sorto di pendula cu ta zwaai asina, cu un peso di sigur 1 meter pa 30 centimeter hancho esta un bloki di hero mara na un kabel, anto esey ki ora bo los esey na halto e ta bin abao , y e peso di bin abou ta trek e , e ta keda bin abao poco poco anto esey durante cu e ta bin, e mesun peso cu e ta bahando, e ta pone hopi wiel chikito draai den otro. E Faro lo draai di 6or di atardi ora solo ta bahando  pa 6or di mainta , durante cu e luz ta draai henter anochi riba e farolin, e ta baha net 24 meter, anto e faro ta 30 meter kemen e ta traha net pa e no dal abao” Sr. Fingal ta splica.

Sr. Fingal ta sigui bisa cu den un anochi, e ta draai 4,320 biaha rond y gasta 1 galon di farolin pa henter e trabao ey. ”E farolin tabata haya e tempo ey for di drum di Lago, tur dia e tabata bin abao anto pa bolbe start e luz pa e pega tin cu bolbe lanta e peso, pues nos trabao como mucha tabata pa crank e , hisa e peso te na halto atrobe pa atardi ora cu e luz ta pega nan ta bolbe saca esey, y e luz ta keda baha. Asina e por traha masha hopi tempo largo” Sr. Fingal ta splica.
Danki na Monumentenfonds Aruba cu a traha hopi duro y ta encarga cu e Faro aworaki, pa locual Sr. Fingal ta hopi contento di dje hunto cu tur e renobacionnan cu tin y ta biniendo ta spera cu e historia di Faro sigui biba pa mas generacion nos dilanti.

LEAVE A REPLY

Please enter your comment!
Please enter your name here