Universidad di Aruba: ‘Nos kier mantene e conexion bibo’

Glenn Thode, rector di universidad di Aruba’ a splica di importancia di e seminario cu We Connect Aruba ta haciendo pa trece e conexion cu tanto hende cu sali di isla pa traha of studia afo. Pa locual nan desaroyo y talento por beneficia e isla.

We Connect ta existi y ta activo na Aruba pa 4 aña. Na Hulanda nan ta haci actividad pa dos cos; e prome ta pa persona conecta cu Aruba y e di dos ta pa, kisas e persona por wak si tin oportunidad pa atrae nan bolbe na nan pais natal, ‘preferiblemente den parti Caribeño den Reino Hulandes’.

Segun Thode, na Aruba ta sinti e falta di conscientisacion, e falta di bon discusion riba e punto di necesidad cu tin den e mercado laboral. E ta bisa cu ora studiante atende Universidad di Aruba of ta bay afo, nan pensamento no ta cla di kico nan por studia pa por traha despues, ki trabou nan ta haya.

Thode ta expresa cu actividad nan aki ta eleva conscientisacion y netwerk, caminda tur hende por conecta cu otro “E iniciativa di We Connect pa bin cu tipo di seminario asina, ta cuminsa e discusion y ta habri e canal den nos mundo academico.”

“Nos ta invitando nos comunidad academico pa participa den dialogo. No solamente nos kier tende di e panel, pero otro bos y opinion riba e tema pa por scucha e experiencia di otro hende, pa por hiba esey den nos pensamento, pa continua cu maneho y tuma decision”, Thode a bisa.

E ta un manera pa conecta e hubentud cu e mercado laboral. Mayoria di biaha no por haya conexion cu Arubiano cu ta rond di mundo. Di e forma aki nan kier haci e actividad aki atractivo pa esunnan cu ta afo, pa nan ‘sali di unda nan ta y bin Aruba pa contribui’.

E seminario ta pa comunidad, manera profesionalnan hoben y dunado di trabou. Tambe pa esunnan cu tin experiencia den area laboral, pa wak kico nan por ofrece, pero tambe pa wak kico e profesionalnan hoben ta pidi di nan, y por cumpli cu e deseo ey.

Pa finalisa, el a bisa cu enfoke pa por cambia e manera di traha, pa haci’e mas facil pa graduadonan den exterior por bin Aruba bek, asina por traha miho cu otro y beneficia e isla. Nan ta reconoce cu tin talento pafo di Isla, hasta si nan kier traha pafo, pero den conexion cu nan.