Presidente di Uruguay, Tabaré Vázquez, a anuncia diamars pasa cu a descubri un ‘tumor pulmonar’ cu apariencia maligno, cu lo oblig’e pa drenta den hospital y haya un diagnostico definitivo.

E Hefe di Estado a drenta den Asociacion Española, fuentenan medico a confirma. Eynan lo bay realisa un ‘puncion pulmonar’ cu su ekipo medico di confiansa.

E medico personal di Vázquez, Mario Zelarayán, a informa cu e estudionan pa sa e pasonan cu lo sigui lo bay realisa awe of mañan diabierna. E resultado lo bay tarda rond di 15 dia.

Tambe e dokter a afirma cu tin sospecho cu e Presidente tin cancer. “E tumor tin tur caracteristica tomografico di ta un cancer maligno, pero tin cu studia esey”, Zelarayán a bisa.

E factornan genetico ta influi, aunke den e caso di cancer di pulmon, ta incidi pa via di exposicion pa huma di tabaco, Zelarayán a bisa. “Tur sospecha ta indica cu ta pa via di ta un humado pasivo”, e profesional a sostene.

Vázquez, un Dokter Oncologo cu a declara guera contra tabaco na Uruguay, ta goberna desde 2015 su di dos periodo na e pais Sur Americano, mandato cu lo culmina na maart di 2020.

“E situacion aki ta obliga pa haci studionan complementario, sigur y posiblemente den e siman aki, cu lo rekeri un of dos dia den hospital”, e mandatario a adelanta. “Cu e estudionan aki lo conoce e diagnostico definitivo”, el a resumi dilanti di tur su minister y prensa presente.

Vázquez a bisa cu e ta sinti su mes bon y a señala cu ta spera cu e mediconan lo ‘duna e pronostico y tratamento eventual’ pa cual e tin cu somete y a adelanta cu lo cumpli e etapa ey na su pais.

 

LEAVE A REPLY

Please enter your comment!
Please enter your name here