(Mercopress)—Corupcion den Latino America ta un di e problemanan mas notorio riba agenda di region. Den e ultimo decada a amplia e cantidad di operacion hudicial grandi cu a expone schemanan di corupcion unda Gobiernonan y companianan ta envolvi.

Segun Transparency Internacional, TI, corupcion a keda mara fundamentalmente den e politica di Latino America pa mas cu un decada sin poco progreso y hopi decadencia den termino di democracia y derechonan humano.

E siman aki TI a publica su di 10 edicion di e CPI, cu ta e Indice di Percepcion di Corupcion. Ta trata e CPI pa 2021, unda e organisacion a adverti e deterioro special den Centro America. Motibo ta cu autoritarianismo ta aumentando. Pero tambe e ta papia di e data acumula di e ultimo decada den democracianan consolida manera Chile of Uruguay, cu ta paisnan cu ta sali miho den e region unda tin mas desigualdad na mundo.

Uruguay y Chile ta lidera e lista cu 73 y 67 punto respectivamente for di un maximo di 100, mientras cu Venezuela y Nicaragua, cu 14 y 20 punto ta keda e paisnan mas corupto den region, segun e CPI.

Di otro banda, practicamente ningun pais por gaba cu mehoracion grandi den e ultimo 10 añanan despues cu a cuminza publica e indice. Mayoria a keda sin haci progreso of hasta a cay den categoria y punto basa riba e data compila pa TI.

Uruguay di otro banda a gana dos punto compara cu 2020 y ta lidera Latino America cu e pais menos corupto den un continente hopi corupto.

E paisnan cu ta sigui Uruguay y Chile ta Costa Rica cu 58 punto, Cuba cu 46 y Colombia cu 39. Brazil y Argentina tin e mesun cantidad di punto abou, esta 38, y ta sigui pa Ecuador, Panama y Peru, tur cu 36, El Salvador cu 34, Mexico cu 31, Bolivia, Republica Dominicana, Paraguay cu 30, Guatemala cu 25 y Honduras cu 23 punto.

E relato ta compara e evolucion di e paisnan den e ultimo 10 añanan y a nota cu Paraguay tabata e unico cu a mehora su puntuacion di forma significante. Chile, Guatemala, Honduras, Nicaragua y Venezuela a cay atras considerablemente.

Luciana Torchiaro, consehero regional pa TI Latino America a splica cu e stagnacion aki no solamente a mina democracia y derechonan humano, pero tambe a pone cu pobresa y desigualdad a aumenta, y a afecta e lucha contra e pandemia.

LEAVE A REPLY

Please enter your comment!
Please enter your name here