(NLTimes) – Trudy Scheele-Gertsen, ken a ser forsa pa duna su yiu den adopcion na aña 1968 como un muhe hoben y soltero, no por considera e estado Hulandes responsabel pa loke a pasa na su persona. Corte na Den Haag a rechasa su acusacion.

Segun e corte, sociedad y variso otro factor a pone cu hende muhenan manera Scheele-Gertsen tabata bao di presion inmenso pa duna nan yiu den adopcion. Como resultado di esaki, nan tabata “incapas di tuma decisionnan relaciona cu nan mesun liberdad.” Scheele-Gertsen a culpa su sufrimento na Child Protection Board, sinembargo precisamente pa causa di e presion social tremendo, corte “no por bisa cu e conseho a actua fuera di ley.”

Servicionan di proteccion di mucha no a yuda mamanan soltero cria nan yiunan nan mes, pero esaki no tabata nan trabao e tempo aki, segun Hues.

Ademas, e caso ta cay fuera di e limitacion di tempo. Scheele-Gertsen por a entrega su keho te cu 1994.

E “reviso legal” haci pa e huesnan no a desbalora e dolor cu Scheele-Gertsen a sufri segun loke corte a bisa. “Nos no por bolbe bek den tempo. E no ta bo culpa cu bida a tuma e rumbo aki,” e hues a expresa.

Scheele-Gertsen tabatin 22 aña di edad y soltera ora cu el a haya un yiu den aña 1968. El a duna lus na Paula Foundation na Oosterbeek. Poco despues di duna lus, su yiu a ser kita for di su persona. E mucha prome a keda cu e soeurnan y despues a ser adopta. Scheele-Gertsen a logra contacta su yiu bek te na aña 2018.

Mas o menos 15,000 hende muhe a enfrenta circumstancianan similar na Hulanda entre aña 1956 te cu 1984. Bureau Clara Wichmann a uni na Scheele-Gertsen su caso representando e muhenan aki. E agencia su demanda tambe a ser rechasa y clasifica como fuera di limitacion di tempo. Nan mester a enttrega nan demanda prome cu aña 2004.

Bureau Clara Wichmann, cual ta defende derechonan di hende muhe, ta haya cu e sentencia di e hues a desapunta nan. “Con esaki lo ser conta den historia, nos ta pensa. Como un inhusticia cu a ser haci na miles di muhe, cu ta reconoci, y cu un estado cu ta tuma pasonan pa tende nan storia, bolbe gana nan confiansa y apoya nan? Of como un caso cera?.”

LEAVE A REPLY

Please enter your comment!
Please enter your name here