Van Huffelen kier haya puntonan en comun pa COHO

(TheDailyHerald) – Secretario di Estado Hulandes pa Relacionnan di Reino y Digitalisacion, Alexandra van Huffelen ta hay’e importante pa establece e Organo Caribense pa Reforma y Desaroyo, COHO, den consulta estrecho cu Aruba, Corsou y Sint Maarten. E ta bay bishita e paisnan den futuro cercano pa resolve e diferencianan.

“No tin sentido pa implementa reformanan si bo no ta kere den nan”, el a bisa medionan di comunicacion despues di e reunion di Conseho di Minister di Reino riba diabierna ultimo, segun un relato di portal noticiero,The Daily Herald.

A puntra e Secretario di Estado tocante e decision pa retrasa e proceso di tratamento di ley di reino pa establece COHO basa riba un solicitud di e parlamentonan di e tres pais di Caribe Hulandes.

E termino pa entrega e respuesta formal na e propuesta di ley di reino COHO a bira 13 di mei na luga di 20 di april. Esaki a pone e finalisacion di e proceso di tratamento di e ley prome cu mita di juli bao presion.

“E parlamentonan a pidi pa un tiki mas tempo pasobra di e forma aki nan tambe por usa e IPKO [red. Consulta Inter-Parlamentario di Reino] pa consulta cu otro. Esaki ta algo inteligente pa haci y ta duna nan tempo pa discuti nan pregunta y preocupacionnan, pa papia riba kico ta preocupa nan”, Van Huffelen a bisa.

E Secretario di Estado a splica cu despues di esey, e ta bay sinta cu e paisnan pa papia tocante e respuesta na e preguntanan cu a keda presenta. “Esaki tambe ta bay dura su tempo pasobra nos mester discuti esaki exhaustivamente”, el a bisa.

Negociacionnan cu e paisnan ta bay tuma lugar na momento cu e Secretario di Estado bishita e islanan na mei y juni proximo. Van Huffelen a bisa cu e negociacionnan presencial aki ta hopi importante. Despues di esaki, ta bay manda e propuesta di ley pa tratamento den Tweede Kamer y Eerste Kamer di parlamento Hulandes.

“Ainda tin algun stap pa tuma, pero mi ta kere ta hopi bon pa sa e preocupacionnan cu cada un di nos tin, kico ta e cosnan cu ta preocupa e parlamentonan, kico posiblemente nan lo kier pa cambia. Si nos por haci esey hunto lo mas posible cu e Tweede Kamer, cu speransa nos por conclui e discusion prome cu berano”, el a bisa.

Haciendo esaki hunto y cu cautela ta clave pa e Secretario di Estado. “Mi ta haya esey importante pasobra e ley aki no ta pa trata solamente e puntonan basico di COHO, sino tambe ta pa haci e paisnan mas resiliente contra shocknan economico y pa pone tur cos den orden cu no tabata den orden antes. Esey ta algo na cual felizmente nos ta duna nos sosten. Reforma no tin sentido si bo no ta kere den dje.”

Van Huffelen ta un proponente di dicidi hunto kico mester haci. “Cu nos ta dicidi hunto riba ki topiconan ta importante pa ehecuta, basa riba cual nos ta tuma e stapnan. Pa tin e basa den orden, y bay di acuerdo riba kico ta lo mas importante den proximo lunanan. Despues di esey, nos por mira mas leu riba e crecemento di economia y inversionnan nobo.”

Pa loke ta trata e reunion di Conseho di Minister di Reino di diabierna ultimo, Van Huffelen a bisa cu no a tuma ningun decision mayor. Loke si a discuti tabata e evaluacion di e prestamonan cu a duna na e paisnan di Caribe Hulandes como sosten di likides durante pandemia di Covid-19.

Tambe a discuti e rol di e Colegio di Supervision Financiero CFT, y e Colegio di Supervision Financiero di Aruba, CAft; tambe e importancia di implementa e recomendacionnan. “Nos a bay di acuerdo pa evalua con nos, hunto cu CFT y CAft, por reforsa mas ainda e funcionnan financiero di e paisnan”, Van Huffelen a bisa.

Van Huffelen a confirma cu e ta bay biaha na e islanan na mei y juni. E no a specifica cua islanan e ta bay bishita na ki momento, pero el a bisa si cu na lugar di bishita tur seis isla durante un bishita largo, e ta bay haci dos biahe separa.

Un factor importante pa Hulanda Caribense ta pa yega na acuerdonan cu e entidadnan publico riba con ta bay aloca e 30 miyon euro di envelop di Hulanda Caribense. Cu e paisnan, ta bay tin consultanan tocante e COHO. Van Huffelen a bisa cu su bishita no lo coincidi cu e IPKO. “IPKO ta un reunion entre e parlamentonan. Ta importante pa prome nan haci nan trabao.”