Den un carta cu fecha 6 di februari 2024, secretario di estado Alexandra van Huffelen a duna relato na Tweede kamer encuanto e progreso logra te awor cu e Landspakket den su diferente version pa e islanan Corsou, Sint Maarten y Aruba.
El a relata cu e promer añanan a dedica na analisis y investigacion y cu awor por a inicia e trayectonan di cambio, cu den e fase di diseño a costa hopi tempo pero segun e mandatario tabata necesario pa un “proceso cuidadoso, participativo y duradero, acopla na capacidad y contexto di e Paisnan. E investigacionnan tambe a trece dilanti cu mas claridad “e complehidad, impacto, interdependencia y dependencia di e reformanan, cu e consecuencianan di esey pa e acercamento y capacidad di implementacion cualitativo y cuantitativo necesario. Pa e Landspakketnan logra segun mi vision cu nos mester mas tanto posibletuma como punto di salida e capacidad di absorcion local y cu refuerzo localmente ta necesario pa un resultado duradero.”
Van Huffelen ta pone enfasis tambe riba necesidad di pone prioridad y ‘temporisa’ como tema importante den discusion cu e islanan, buscando un balance entre e urgenca di e reformanan pa e poblacion y di otro banda e “factibilidad di ehecucion den sentido politico, financiero y practico. E discusion aki no mester stroba e progreso. Mi ta sigui anto e implementacion di e Landspakketnan cu atencion, den cual mi ta den conversacion regularmente cu e promer ministronan di e Paisnan tocante e obstaculonan y e manera con Hulanda por apoya e Paisnan.”
Landspakket di Aruba
Pa loke ta nos isla, e secretario di estado tabata relativamente positivo, observando cu riba diferente tereno tabatin avance. E ta menciona entre otro como reforma importante un sistema fiscal mas simple, cu mas recurso pa gobierno y mas enfasis riba impuesto indirecto. Di e introduccion di e sistema di BTW e secretario di estado ta bisa cu e “implementacion di e sistema di BTW pa reemplaza e actual impuesto riba benta a resulta mas compleho y politicamente sensitivo cu a anticipa.” E ta menciona cu pesey “Aruba a scoge pa un impuesto riba benta ‘na frontera’; como adicion na e sistema actual y banda di esey un serie di cambio cu ta contribui na un sistema mas husto cu un base mas amplio.”
Van Huffelen a continua bisando cu a pesar cu esakinan ta paso importante, e ta urgi Aruba haci mas cambio, entre otro a traves di simplificacion di e sistema (fiscal) cu mester aumenta e factibilidad di implementacion, y cu esey e cumplimento. Como cu cualkier sistema ta depende di e calidad di ehecucion y e servicio na e cliente, a dicidi di duna prioridad na mehoracion di e aparato ehecutor envez di cambio den legislacion di e sistema fiscal, segun Van Huffelen. Esaki ta encera entre otro prioridad pa caba cu e retraso den trabao di obhecion, cual lo bay tuma tres aña. Di otro banda ta traha na modernizacion di servicio di impuesto, unda Belastingdienst Caribisch Nederland ta duna asistencia.
En general, Van huffelen ta mustra satisfaccion cu desde firmamento di e Landspakket na fin di 2020, a logra avance riba tur tema, y ta ilustra algun di nan. Como aspecto importante e ta menciona e administracion financiero cu ta forma e base pa presupuesto y cuenta anual.
Pa atende e falta di regla y cuadro adecuado riba tereno di reportahe financiero a logra recientemente e sistema di reportahe y tambe den e proceso di presupuesto a logra progreso importante, segun e mandatario, cu a referi na e presupuesto y e ‘voorjaarsnota’ na tempo. E intentonan tuma tin como meta pa aña 2026 bira esun unda lopor presenta un cuenta anual cu aprobacion di accountant.
Mehoracion general aparato publico
Pa mehora calidad y efectividad den sector publico ta enfoca riba e restructuracion amplio y ambicioso di e aparato publico, segun e secretario di estado. Esaki cu e meta pa keda dentro di e limite di 10% di GDP. Esaki ta requeri un modernizacion di e instrumentonan di Recurso Humano, pa ambtenaar y tambe automatizacion di proceso clave. Actualmente ta haciendo un ‘kerntakenanalyse’ cu mester identifica e tareananclave. Tambe a diseña un sistema di prestacion pa empleado publico cu mester bin na vigor e kwartaal aki, segun e mandatario. Tur e medidanan lo mester conduci na mehoracion di servicio gubernamental visible, manera gobierno di Aruba tambe a indica, segun Van Huffelen.
Tambe ta haci menciondi e cambionan den ley pa introduci e registro na Aruba di e ‘Ultimate Beneficial Owner’ (UBO-register) na Camara di Comercio, pa por tin mas vista riba e interesadonan final di empresanan. Tambe cambio di ley pa mehora control riba labamento di placa y financiamento di terorismo (AML/CFT). Ta trahando tambe riba proteccion di consumidor y un sistema di garantia di deposito, pa proteha tenedor di cuenta bancario contra posible bancarota di e institucion bancario.
Riba tereno social-economico lo a yega na 2023, despuesdi consulta cu empleador y sindicato, na un decision di principio encuanto un serie di “cambio di sistema drastico”, cu ta abarca entre otro “modernizacion di mercado laboral, den combinacion cu fortificacion di e sistema di seguro social y ‘handhaving’.” E implementacion di e cambionan den e sistema lo por dura varios aña ainda, unda ta enfoca primeramente riba adaptacion di ley y colaboracion entre e organizacionnan involucra. Ta menciona como logro importante pa economia tambe e introduccion di Aruba Fair Trade Authority, cu mester bay contribui na un ‘level playing field’ entre empresa y combati abuso di posicion di poder economico.
A haci mencion tambe di acuerdonan den sector di salubridad publico, unda Hulanda ta bay duna apoyo financiero pa fortifica e ‘eerstelijnszorg’. Revision di enseñanza a conduci na un plan integral cu diferente accion cu mester siguiunda e maneho di idioma a keda dicidi y ta den implementacion caba. A keda ainda aspecto manera acoplamento na mercado laboral, calidad di docente, lespakket, y edificio. Ta anticipa cu mehoracion di enseñanza por bay dura sigur un decada ainda y lo costa bastante inversion. Finalmente e carta di Van Huffelen a indica cu encuanto supervision di e sector di wega di placa, ta haci preparacion pa institui un autoridad supervisor. Un ‘kwartiermaker’ lo cuminza traha riba e set up di e autoridad e aña aki.
Nota di redaccion:
Den e proximo tempo nos lo referi mas ampliamente na diferente asunto cu a keda trata den e informacion aki encuanto e estado di colaboracion dentro di e Landspakket.
