Varios problema di infertilidad ta relaciona cu sobre peso

Ginecologo, Babet Latour a papia con sobrepeso tin su influencia riba problema di fertilidad. No solamente peso di mas ta trece cu cantidad di problema di salud entre nan problema cardiovascular di presion halto y sucu. Pero tambe a keda demostra cu un persona obeso tin mas dificultad pa haya yiu cu un persona cu un peso normal.

Sinembargo esaki no kiermen cu tur hende cu peso di mas ta infertil. Dr. Latour a laga sa cu esaki no ta conta pa tur hende ya cu tin hende sumamente obeso cu no tin problema do fertilidad.

Sinembargo ora cu nan ta analisa un cantidad di data nan por mira cu sobre peso ta hunga un rol toch riba fertilidad y esaki ta conta tanto pa hende homber como pa hende muhe. Den e caso di hende homber nan calidad di sperma cu ta esun cu ta fertilisa e webo ta baha. Mientras cu pa e hende muhe e ciclo di fertilidad cu e tin pa Sali na estado durante su menstruacion ta bira iregular.

E hende muhe cu ta presenta e problema aki nan ta haya nan menstruacion tin biaha cada dos pa tres y te hasta cuater luna, pero tin otronan cu nan no ta hay’e. Tur esaki tin c haber cu ovulacion. Normalmente e menstruacion ta sosode dos siman despues di e ovulacion. Esaki den caso cu e webo no a keda fertilisa pa e sperma.

E hende muhe cu peso di mas, specialmente esunnan hopi obeso, lo por presenta un ovulacion cu problema of un falta di ovulacion. Pues sin webo no por tin embaraso. Esaki ta debi na un sistema di defensa di e mesun curpa, ya cu e persona obeso tin mayor riesgo durante embaraso y durante parto.

Tambe e hende muhe den un situacion asina ta core mas riesgo di sufri abortonan espontaneo. Esaki lo por sosode entre un 40 pa 50% di nan embarasonan. Esaki ta nifica cu ta wordo haci un esfuerso grandi pa un hende muhe demasiado obeso lo por Sali na estado. Mientras cu e probabilidad di un aborto natural den e prome 12 siman na estado ta aumenta fuertemente.

Otro riesgonan relaciona cu embarasonan di personanan cu sobre peso ta inclui presion halto, diabetes y/of pre-eclampsia. Segun informacion cu e matutino aki por a compila, preeclampsia ta un condicion cu solamente ta sosode durante embaraso. Algun sintoma di pre-eclampsia ta inclui hipertension y proteina den e orina cu ta sosode despues di 20 siman di embaraso. Frecuentemente pre-eclampsia ta relaciona cu hipertension pa causa di embaraso. Pre-eclampsia ta afecta por lo menos 8.5% di e embarasonan.

Otro riesgonan relaciona cu embarasonan di personanan cu sobre peso ta inclui cu nan tambe por haya baby cu sobre peso of baby demasiado chikito debi na un mal funcionamento di e placenta.

Igualmente e riesgonan di un hende muhe obeso asocia cu e parto ta exigi e necesidad di provoca e parto cu ta trece su propio riesgo. Tambe e necesidad di un cesarea y mayor probabilidad di bashamento di sanger

Ginecologo, Babet Latour a bin cu algun recomendacion pa e persona cu sobre peso cu kier sali na estado. Un recomendacion tin di haber cu bahamento di peso prome. Aunke e specialista aki ta admiti cu esaki eventualmente lo por resulta dificil pa e persona. Generalmente nan tin cu combina un dieta mas saludabel cu actividad fisico of movecion, ya cu simplemente cuminsa come tiki no es suficiente.