E siman aki, sindicatonan cu ta representa e trahadonan di Post Aruba (SEPPA y STA) lo sigui reuni cu gerencia di e empresa estatal aki pa atende cu e situacion cu Post Aruba ta pasando aden cu intermediacion di Mediador di Gobierno, Sr. Anselmo Pontilius.

Ya caba nan a yega di reuni dos biaha. E delaster tabata siman pasa, caminda e dirigente di SEPPA, Magaly Brito a declara na Bon Dia Aruba cu ya caba den e prome reunion, gerencia di Post Aruba a haci un presentacion di e cifranan financiero di e compania estatal aki.

E ultimo reunion a conta cu presencia di minister Chris Romero, caminda Post Aruba ta resorta den su ministerio. E mandatario a bin dilanti un biaha pakico gobierno no por keda cumpli cu e 105 florin di aumento di salario di trahadonan di post. Nos ta bibando den un crisis y na mesun momento esaki ta un di e condicionnan cu Hulanda a pone tambe. Asina e mandatario a informa den e reunion aki.

Sindicalista Brito a trece dilanti cu esaki ta e discusion cu nan tin awor. E ta consciente cu e no ta uno facil, mirando cu ya e trahadonan a entrega e 12.6% caba. E cortamento di e aumento aki ta bira practicamente otro “dolor pa cu nan,” el a bisa. Sinembargo e intencion ta cu si nan por yega na un acuerdo pa esaki bay den un protocol. A bin dilanti e peticion pa kita e aumento aki pa semper.

Di banda di SEPPA nan no ta di acuerdo cu esaki. Por cierto sindicato STA tambe tin e mesun posicion aki. Ya cu nan ta consciente cu nos ta bibando den un temporada di crisis, pero tampoco nan no tin idea na ki momento esaki ta termina. “Esey ta nifica cu si e trahadonan ta bay di acuerdo, esaki mester keda suheto na evaluacion pa cada periodo,” segun Magaly Brito di SEPPA. Tur esaki a keda pendiente pa e reunion proximo.

Situacion post

E situacion di post riba su mes ta preocupante. Brito a trece dilanti cu mundialmente e servicio di post a cay considerablemente. Pero e ta haya cu esaki no ta kita afo cu no ta asina cu gewoon nan ta kita cera un compania asina. “Con ke sea tin un of otro servicio cu nos hendenan ta haci uzo di dje,” el a bisa. Post Aruba tin e servicionan ey caminda nos hendenan keto bay ya haciendo uzo di nan y esaki por genera un entrada. “Locual e por hustifica cu bo ta tene bo trahadonan na pia di trabao,” el a bisa. Esaki ta locual SEPPA ta apunta na dje.

P’esey nan ta keda den e discusion riba e derecho di existencia cu Post Aruba tin keto bay. Pero e ta kere cu esaki ta un situacion, caminda hunto nan tin cu yega na un solucion na bienestar di e compania, pero manteniendo cupo di trabao di tur trahado.

Nan ta papiando di un grupo di 101 trahado na servicio di Post Aruba. Sinembargo tin combersacionnan andando pa un grupo di trahado di cual na corto plaso nan por yega na edad di pension. E ta haya cu si nan ta yega na acuerdo cu un grupo di trahado cu ta bayendo cu pension, esaki tambe ta aporta pa baha e presion un poco y e ta baha gasto di e compania estatal un poco. Tur esaki ta den discusion, pero idea ta pa yega na un acuerdo hunto.

“Nada imponi pasobra na final nos no mester wak e parti economico so. Nos tin cu wak e parti social y humano,” sindicalista Brito a declara.

 

Otro preocupacion existente tin di haci cu e futuro di e compania estatal aki despues cu gobierno a firma un acuerdo cu Hulanda dia 13 di november ultimo cu un landspakket cu condicionnan inclui. E lider sindical a indica cu esaki ta un preocupacion no solo di e trahadonan cu ta labora den e companianan estatal, pero tambe di nos tur.

E ta haya cu den e mundo sindical nan ta preocupa di mira trahadonan cu ya caba ta perdiendo trabao, independientemente cu gobierno ta purba di alivia e situacion cu algun ayudo manera FASE, subsidio di salario, etc… Pero pa 2021 si e situacion di nos pais no mehora, e ta bira un incertidumbre pa sa kico mas ta bay cambia. Como sindicato nan no kier ta pesimista ya cu e deseo ta cu e situacion actual por cambia pa uno mas miho.