Tin varios scol cu lo conoce cambio den su nomber. Segun minister Armando Lampe a drenta un peticion pa cambia e nomber di Pieter Boer School pa esun di e pelotero Xander Bogaerts kende ta un ex alumno di e scol aki.
E deportista aki cada bes cu ta bin Aruba ta percura pa bishita e scol aki como un gesto di gradicimento na e cuerpo di docente di e scol aki.
E ultimo dianan e scol aki a bira victima di vandalismo. E ta un di e ultimo scol cu a haya airco den tur su lokaalnan. Minister Lampe a lamenta e acontecimento negativo aki. El a laga sa cu nan ta bezig pa renoba tur e bentananan pa haci e scol aki mas safe. Ya cu nan ta consciente di e problema di vandalismo den e scol aki.
Segun e mandatario e presencia di compania di siguridad no ta garantisa cu no lo sosode mas vandalismo. P’esey e ta referi na un plan integral di siguridad cu ta inclui entre otro camaranan di vigilancia, pero tambe aspecto di siguridad den bario.
Otro maestronan cu nan nomber lo wordo honra pa batisa varios scol ta e docente y artista Nigel Matthew como un rol model den e mundo di enseñansa. Tambe Emma School lo carga e nomber di zuster Juliette kende ta un maestra di scol hopi stima y admira.
Minister Lampe a bisa cu den cuadro di Aruba su recuperacion nan ta bay enfoca tambe riba e balor di e maestronan. Tur e cambio di nomber den diferente scol lo tuma luga den proximo lunanan pa duna realce na algun maestronan den representacion di tur maestro na Aruba.
