(Infobae) – Gobierno di Venezuela, lidera pa presidente interino Delcy Rodriguez, a firma acuerdo cu dos compania di Merca pa impulsa produccion di petroleo crudo y gas, den un evento na Palacio di Miraflores cu presencia di un delegado di Cas Blanco.
E acuerdo nan a ser firma cu Hunt Overseas Oil Company y Crossover Energy, cu lo opera den Orinoco Belt — considera e reserva di petroleo pisa y extra-pisa mas grandi di mundo . E companianan lo traha hunto cu PDVSA pa desaroya produccion den e region .
E acuerdonan tambe ta cubri campo nan den estado nan di Anzoategui, Monagas y Barinas, cu enfoke riba explotacion di petroleo y uso di gas asocia.
Rodriguez a bisa cu e iniciativa tin como meta tambe fortalece sistema electrico nacional usando gas, declarando cu interesnan di Merca y Venezuela ta enkontra den e proyecto aki .
Durante e evento, el a manda un mensahe na Donald Trump, enfatisando compromiso pa construi relacionnan bilateral fuerte y di largo plaso entre ambos pais.
Pa su parti, enviado Mericano Jarod Agen a indica cu e acuerdonan ta refleha interes di inversion significativo. Segun e, e proyectonan por representa mas cu $2 biyon den inversion, cu enfoke riba petroleo, gas y sector minero.
E oficial Mericano a destaca cu e progreso ta posibel danki na reestablecemento di relacion diplomatico despues di captura di Nicolas Maduro na januari, lo cual a habri caminda pa companianan Mericano bolbe drenta mercado energetico Venezolano .
E bishita di delegacion Mericano a coincidi cu e prome vuelo directo entre Caracas y Merca den 7 aña, marcando un paso importante den normalisacion di relacionnan bilateral.
Ademas, Venezuela a tuma medidanan pa habri su industria energetico na inversion stranhero, incluyendo reformanan den ley di hidrocarburo cu ta permiti mas participacion priva . Esaki a atrae interes di otro multinacional manera Chevron, Eni y Repsol.
Rodriguez a conclui resaltando cu e etapa nobo aki di cooperacion ta representa e caminda corecto pa futuro di relacionnan entre ambos nacionnan.
