Venezuela ‘al borde’ di collapse? Un analisis realistico

E siguiente analisis ta basa riba un entrevista, haci pa e medio Aleman Deutsche Welle, y publica pa Lapatilla.com, cu e economista Sary Levy-Carciente, di Universidad Central di Caracas y miembro di Academia Nacional de Ciencias Economicas di Venezuela. E ta centra alrededor di e pregunta: Gobierno di Nicolas Maduro ta al borde di un collapse economico? Levy-Carciente ta pensa cu si pero no kier duna un plazo.

DW: Un estudio di banco Barclays ta yega na e conclusion cu economicamente ta keda dos siman ainda pa gobierno di Nicolas Maduro. E autornan di e analisis ey tin rason?

Sary Levy-Carciente: e situacion economico Venezolana ta deteriorando na un velocidad acelera den ultimo añanan, mas ainda desde 2017. Y, efectivamente, tin momento den cual cu , ora bo revisa cuenta, bo ta considera cu ta keda nos ainda dia, maximo un par di siman o un luna pa gobierno collapse. Sin embargo, nos a observa tambe y a siña a lo largo di e añanan aki cu, lamentablemente, no ta importa e regimen cu e ciudadania ta cada bes den circunstancia mas grave y ta tuma recurso cu cualkier gobierno lo a destina na su poblacion, pa logra sobrevivi politicamente den e coyuntura di momento. Por lo tanto, aunke mi ta comparti e evaluacion critico cu Barclays ta haci encuanto e realidad Venezolano, mi no gusta pone tempo specifico pa e collapse.

Di ki recurso Maduro ta dispone ainda?

Parti di e problemanan cu nos a enfrenta como profesional di e area economico ta hustamente e falta di informacion y e falta di claridad den e informacion disponibel aki. Di esey ta bin e dificultad di atende e realidad macro economico cu e debido profesionalismo. Ta berdad cu nos a observa tin ora transaccionnan straño, por ehemplo, revisando e cuentanan di Banco Central y nos ta mira cu tin entradanan di oro. (…) Nos no ta conta cu un informacion solido pa por duna un respuesta 100 porciento respalda na bo pregunta. Loke si ta berdad ta cu e entradanan tradicional di e regimen, cu tabata e impuestonan riba ciudadania y empresa, y naturalmente e beneficionan di e exportacion petrolero, cada bes ta bira menos.

E sancionnan di Estadonan Uni ta mustra efecto?

Como cu e pagonan di transaccion petrolero ta tarda un tempo pa tuma luga, tin un lapso di tempo den cual ainda gobierno por ricibi algun entrada di benta realisa anteriormente. Pero, definitivamente, nan ta bay sinti e impacto.

Cual tabata e erornan mas grandi di gobierno di Maduro den politica economico?

No ta asunto di un eror di politica economico, sino e resultado natural di un economia politico, di un modelo politico ideologico cu ta sofocando, golpiando, impidiendo produccion di sector priva; cu ta controla y asifixia e sectornan productivo; cu ta tratando di impone y defini, desde un toren di ivoor di planificacion centralisa, e dinamica economico. Y, di berdad, esey no ta funciona asina. Di igual manera, desde cu e siglo aki a cuminsa, Venezuela a pasa den un proceso di destruccion di institucion. Esey ta hiba na destruccion di estado di derecho, ta impedi transparencia y tur esey ta genera desconfiansa. E desconfiansa ta reduci e incentivo di inversion y ora esey pasa, generalmente (e inversionistanan) ta rekeri o exigi un retorno riba nan inversion mas halto y a corto plaso. Anto, desde e punto di bista economico, desde e mesun momento cu ta cuminsa impone e modelo aki, e ta minando dinamica economico. Conta acerca e realidad Venezolano den cual nos ta altamente dependiente di petroleo… Pone acerca tambe e corupcion asocia cu esaki, e desinversion den servicio basico. Y bon, loke ta keda ta un cocktail explosivo.

Si gobierno di Maduro cay, cuanto tempo lo tin mester pa Venezuela recupera economicamente?

Manera tur cos den bida, ta bay depende primeramente di e momento inicial di e cambio. Y, na di dos luga, di con e cambio ta bay. Si e cambio aki logra mustra un berdadero sentido y orientacion adecua pa futuro, mi ta sigur cu esey lo aumenta confiansa y lo atrae inversion, y esey lo facilita reconstruccion di e pais. Naturalmente esaki no lo ta facil. E destruccion den cual Venezuela a pasa e decada aki tabata hopi profundo y tin hopi necesidad sin satisface.

Si abo lo tabata e siguiente minister di Economia, kico lo ta e prome pasonan cu bo ta tuma pa reconstruccion?

E prome cos cu mester haci ta sinta pa evalua un punto di bista macro economico e realidad di e financiamento externo, pasobra mester restructura e debe, renegocia esaki, pidi apoyo di e organismonan internacional y inicia desde e perspectiva ey un saneamento di e cuentanan fiscal. Y e placa ey cu logra trece aden lo mester atende e necesidadnan basico di e poblacion y e inversion den servicionan basico, ya cu esaki lo ta e elemento cu ta bay permiti cu e resto di sector economico y social lo por funciona debidamente. Paralelamente mester reconstrui institucionalidad. Obviamente, nos interes lo ta cu e nacion ta adkiri un sentido democratico, di loke nos ta yama un democracia liberal, cu un orientacion den cual e mercado lo ta e espacio di competencia adecua y sano pa e sectornan productivo, y cu estado lo tuma atrobe debidamente su control di agente regulador y promotor di oportunidad.

Venezuela lo tin mester di un Plan Marshall, manera Alemania despues di Segunda Guera Mundial?

Mi ta kere cu definitivamente Venezuela lo ta bay tin mester di un plan hopi importante di reconstruccion, pero tambe di pacificacion.

 

You May Also Like

mitch henriquez.jpg

OM: lo no persigui e polisnan pa perhurio den caso Mitch Henriquez

– E polisnan acusa di envolvimento den e morto di e Arubiano Mitch Henriquez ...

11DiabeticoGenetico.jpg

E factor hereditario pa haya sucu ta mas halto cu hende ta realisa

Arubanonan no ta suficiente na haltura di e consecuencianan hereditario di biba un bida ...

veterano di guera Korea a fayece na Aruba 1.jpg

Veterano militar di Guera di Korea a fayece na Aruba

Siman pasa a fayece na Aruba un heroe y militar veterano di e Guera ...

FHMD lo tin un encuentro riba abuso domestico cu diferente organisacion

Fundacion pa Hende Muhe den Dificultad (FHMD) ta conta Bon Dia cu pronto nan ...

84 cientifico preocupa ta manda carta pa gobierno

Cientificonan conservacional di diferente parti di mundo cu a traha riba temanan cu ta ...