Den prome 9 luna di 2019 a registra un aumento di 508% den e casonan di victima di tortura na Venezuela di parti di e organismonan di seguridad di estado.

E  Programa Venezolano di Educacion-Accion den Derecho Humano (Provea) a revela e cifra den un informe tocante violacion di derecho humano registra entre januari y september di e aña aki. Direccion General di Contrainteligencia Militar (Dgcim) y e Cuerpo di Investigacion Cientifico, Penal y Criminalistico (Cicpc) ta encabesa e lista di organismo cu ta responsable pa e aumento di terorismo di estado na Venezuela.

E casonan reporta te na e momento aki ta supera sustancialmente esunnan registra na 2018, tempo cu e programa a reporta un total di 109 persona afecta pa tortura. Den prome9 luna di 2019 a denuncia34 caso di tortura, cu a inclui 554 victima individual.

Esaki ta e registro mas halto documenta pa Provea den 31 aña di monitoreo di derecho di integridad personal na e pais,” e informe ta señala.

Provea ta presumi cu e cantidad di caso por ta hopi mas debi na factornan manera falta di colaboracion di entidadnan oficial, obstaculo pa yega na monitor y e temor pa haci denuncia. Ta informa cu e gran mayoria di victima ta masculino (98,55%) y edad ta varia di 18 pa 50 aña di edad.

Di e total di victima den e periodo reporta, 408 tabata priva di libertad pa delito comun, 124 tabata militar deteni pa supuesto conspiracion contra Nicolas Maduro y 22 civil deteni pa motibo politico. Tortura na Venezuela a bira un practica general y sistematico, cometi diariamente na mayoria di prison y centro di detencion,” segun Provea.

 

LEAVE A REPLY

Please enter your comment!
Please enter your name here