Caracas ta sigui crece como e ‘hotspot’ number un di Venezuela pa loke ta e pandemia di coronavirus. Segun e vocero di regimen Chavista, Delcy Rodriguez, diasabra pasa Districto Capital a bira oficialmente e region mas afecta pa e virus di henter e pais, despues di pasa estado Zulia den cantidad di caso positivo.

“E virus ta circula ampliamente,” Rodriguez a confirma den un entrevista telefonico cu e canal di television nacional. En total Caracas tin 1.839 caso detecta pa autoridadnan di gobierno di Nicolas Maduro. Desde 13 di maart Venezuela a registra 14.929 caso positivo, mientras cu diasabra pasa tabata e dia cu e record di 666 caso nobo.

E situacion na Caracas ta parce relaciona tambe cu e municipionan cercano di estado Miranda, cu enfasis riba Petare, e bario pober mas grandi di Latinoamerica, unda e poblacion ta sigui nan caminda den actividadnan diario, sin tanto atencion pa instruccionnan di gobierno pa keda cas.

Te na e momento aki regimen Chavista a usa e metodo di un siman di cuarentena estricto, sigui pa un siman di ‘flexibilisacion’ cu permiso pa opera negoshi, cu no a resulta y a termina den e aumento drastico di cantidad di caso di ultimo simannan.

En vista di e aumento di caso, den ultimo dianan e propio Maduro a anuncia e instalacion di un centro di recepcion di caso den e Poliedro di Caracas, aunke ta bisa cu e instalacionnan ta solamente pa “pacient asintomatico”, loke no necesariamente ta e caso.

Di otro banda, Jose Manuel Olivares, comisionado di presidencia interino di Juan Guaido, a reporta diabierna pasa cu e principal hospitalnan di e capital tabata satura pa e pacientnan di coronavirus.

LEAVE A REPLY

Please enter your comment!
Please enter your name here