Diputado Chavista, Jose Brito diahuebs ultimo a pidi Asamblea Nacional, controla pa e regimen, un serie di acusacionnan contra e parlamento legitimo lidera pa e presidente encarga, Juan Guaido, y a pidi presencia di e esposanan di dirigentenan opositor importante.

Esnan señala pa Brito, den loke medionan di comunicacion Venezolano ta cualifica di ‘caza de brujas’, ta: Fabiana Rosales (esposa di Juan Guaidó), Lilian Tintori (esposa di Leopoldo López), Diana D’Agostino (esposa di Ramos Allup) y Rosaura Valentini (esposa di Goicoechea).

Brito a haci e yamado aki – cu tambe ta inclui Julio Borges, Freddy Guevara, Henry Ramos Allup, Tomás Guanipa, Leopoldo López y José Ignacio Hernández – pa considera cu ta trata di personanan presuntamente involucra den varios trama di corupcion, cu mester ‘splica cu detaye’.

Sin mustra prueba, Brito a sigura cu algun di e diputadonan aki lo a incuri den ‘asociacion pa comete delito’.

Brito a recorda e medidanan adopta pa gobierno interino di Juan Guaido y e sancionnan imponi pa comunidad internacional, y a propone pa Asamblea Nacional chavista cita e esposanan di e cuatro dirigentenan politico opositor pa presenta.

Ademas, Brito a solicita pa tambe cita pa presencia e 37 representante diplomatico di e gobierno interino.

Brito ta sanciona pa Union Europeo pa ta responsabel di socava e funcionamento democratico di e Asamblea Nacional. Ademas e ta sanciona pa Merca pa coopera cu e dictadura chavista den socava Parlamento.

Na 2019, medionan local a revela cu Brito a realisa giranan na Colombia, Spaña, Francia, Suisa, Liechtenstein, Bulgaria y Italia den gestionnan na fabor di e testaferro di Nicolas Maduro, Alex Saab, rason pa cual a expuls’e di e partido Primero Justicia.

Brito ta presidente di Comision Special pa Investiga Accionnan Perpetra contra e Republica pa e Directiva y Miembronan di Asamblea Nacional entre 2016-2021.

Durante e entrega el a informa cu desde 2019 a realisa 42 acto administrativo contra e nacion, ‘e investigacionnan presenta dilanti e Parlamento aki ta basa riba un estudio tecnico, economico y politico di e hechonan cu a tuma luga contra e pais pa un grupo di parlamentario cu tabatin un red tehido desde 2016 pa desestabilisa e pais’, Brito a bisa.

Cu e base aki, chavismo ta pretende di emprende un berdadero persecucion contra e opositornan, y e pedido di comparecencia di e muhenan ta relaciona cu un intento di menasa di mayor alcance ainda.

LEAVE A REPLY

Please enter your comment!
Please enter your name here