Un hues federal Mericano a aproba e benta di e refinerianan di Citgo na Merca, pa permiti e empresa Candes Crystallex cobra 1.400 miyon dollar di daño y perhuicio pa e nacionalisacion di nan propiedadnan na Venezuela pa regimen di Hugo Chavez.

Hues Leonard P. Stark, di Corte Federal di Distrito na Delaware, a emiti su orden despues di cu Corte Supremo di Merca a ratifica dialuna pasa un sentencia anterior den cual a autorisa e liquidacion di Citgo.

Promer cu por pasa pa bende Citgo, e empresa Crystallex, cu a bay bancarota, mester haya permiso di Departamento di Tesoro di Merca, cu a para temporalmente cualkier cambio den status di e empresa, pa oposicion Venezolano no perde Citgo.

Crystallex y e abogadonan di Venezuela tambe mester yega na un acuerdo con ta bay bende Citgo, segun e ultimo decision di Stark.

Sin embargo, e embahador di gobierno interino di Venezuela na Merca, Carlos Vecchio, asigura cu “ningun hende por embarga Citgo sin autorisacion di Oficina di Control di Bienes Stranhero” (OFAC). OFAC ta subdivision di Departamento di Tesoro.

Despues cu gobierno Mericano a reconoce Juan Guaido como e gobernante legitimo di Venezuela, cortenan Mericano a aproba un hunta nombra pa oposicion Venezolano dirigi pa Guaido pa tuma control di Citgo, cu ta valora na 8 biyon dollar.

Oposicion encabesa pa Guaido a indica den un comunicado cua premira e paso aki den e proceso legal despues di e sentencia di Corte Supremo. E accion ta “resultado directo di e politica desastroso di expropiacion di Chavez y su sucesor Maduro,” e texto ta bisa.

LEAVE A REPLY

Please enter your comment!
Please enter your name here