(ElNacional) – Gobierno di Nicolas Maduro ta bay aproba e regreso na combersacionnan cu tabata hibando cu Plataforma Unitaria na Mexico den 2021 y cu tabata pega for di un aña pasa caba. Esaki danki na e acercamento entre Merca y Venezuela.

E informacion a wordo publica pa Efecto Cocuyo y confirma pa e corant El Pais.

E medio Spaño a indica cu desde 2022 delegacionnan di Caracas y Washington a cuminsa contactonan secreto na Doha cu a converti den e canal principal di dialogo cu Nicolas Maduro pa yega na acuerdonan cu e meta di soluciona e conflicto politico prolonga na Venezuela.

Aunke ainda no tin fecha pa e eleccion presidencial na Venezuela, Merca ta sigui aumenta e presion pa avansa pa eleccionnan presidencial liber y husto. Ademas, tin piesanan cu si a move cu ta duna indicacion cu si a yega na algun comprendemento.

E siman aki, Delcy Rodriguez, vice presidente di e Republica, a publica potretnan di su encuentro cu e emir di e Estado di Qatar, Tamim bin Hamad Al Thani, na Doha, como evidencia di e ecnuentronan den cual e pais Arabe ta e anfitrion.

Siman pasa Merca y Venezuela a anuncia e reanudacion di vuelonan pa Caracas pa deporta migrantenan Venezolano sin papelnan di estadia legal. Merca a papia di expulsion y Venezuela di repatriacion.

E gobierno di Maduro, di su banda, ta presiona insistiendo den e lantamento di e sancionnan sectorial y individual cu e Departamento di Tesoro ta mantene contra PDVSA, cual a complica e pais su comercialisacion di e petroleo y consecuentemente a golpia su finanzas.

Sinembargo, segun informacion publica pa Reuters, no ta cla ainda si un flexibilisacion di sancionnan lo ta inmediato cu e regreso di e negociacionnan na Mexico of nan lo mester warda pa gestonan mas grandi di parti di e gobierno Chavista pa concreta esaki.

E chavismo, e medio Spaño ta sigura, tin mester di financiamento pa mehora su situacion cu e eleccion presidencial yegando cerca, den un momento cu e economia ta bolbe cay despues di e señalnan discreto di bida cu el a duna aña pasa. E inflacion, ademas, lo garantisa un biaha mas e ciere cu tres digito pa final di e aña y e proyeccionnan di crecemento a wordo ahusta cu un caida.

For di algun luna, Merca a otorga algun licencia manera esnan entrega na Chervon y e empresanan Europeo Eni y Repsol pa bende petroleo Venezolano cu e meta di paga e debenan cu PDVSA tin cu e companianan stranhero. Reuters ta sigura cu nan a avansa den e combersacionnan aki pa amplia e mesun schedule na empresanan manera esun Frances Maurel & Prom.

Den e tema politico y social, e avancenan ta casi invisible. Casi un aña pasa, e gobierno y oposicion a firma na Mexico un acuerdo pa e uso di e placa Venezolano gevries den cuentanan den exterior pa necesidadnan humanitario na e pais, a traves di un fondo administra pa e Nacionnan Uni cu no a logra concreta ainda.