(ElNacional) – Minister di Comunicacion di Venezuela Freddy Ñañez, a rechasa e propuesta di e presidente di e Comision Europeo, Ursula von der Leyen, di prohibi e emisionnan di Russia Today (RT) y Sputnik den e teritorio di e Union Europeo (UE).
“Y e libertad di expresion? Otro di e mitonan grandi cu Occidente ta laga cay den pleno siglo XXI. Henter nos solidaridad cu e trahadonan di RT y Sputnik. E censura di e UE ta un obstaculo pero no lo logra tapa e berdad”, e minister a skirbi ariba su cuenta di Twitter.
E gobierno di Venezuela a pidi diahuebs pa retoma e caminda di comprendemento diplomatico dilanti e crisis genera na Ucrania despues di e operacion militar anuncia pa e presidente Ruso, Vladimir Putin, e marduga ey.
“Venezuela ta haci un yamada pa retoma e caminda di e comprondemento diplomatico mediante e dialogo efectivo entre e partinan involucra den e conflicto pa evita cu e lo escala”, e ehecutivo a bisa den un comunicado difundi pa Nicolas Maduro ariba su cuenta di Twitter.
Diadomingo, Von der Leyen a propone pa prohibi e aterisahe, lantamento of paso di cualkier avion Ruso den e espacio aereo di UE. Tambe, e emisionnan di RT y Sputnik den e teritorio comunitario, como tambe sancionnan nobo contra Bielorrusia pa su colaboracion cu e invasion di Ucrania.
E medidanan aki ta wordo agrega na e paralisacion di transaccionnan di e Banco Central di Rusia y e exclusion di diferente banconan Ruso di SWIFT diadomingo, como tambe e financiamento Europeo di e compra y entrega di armanan y ekiponan militar na Ucrania..
E propuesta di e comision mester haya e aprobacion di e Conseho (e paisnan) prome cu e por drenta den vigor despues di su publicacion den e Diario Oficial di e UE.
