Presidente interino di Venezuela Juan Guaido ta pidiendo un tribunal na estado di Delaware pa proteha e personanan nombra pa su gobierno interino, reconoci pa gobierno Mericano, den e hunta directiva di Citgo Petroleum Corporation, propiedad di Pdvsa y por lo tanto propiedad di estado Venezolano.

Citgo, cu sede na Houston, ta e principal propiedad di Pdvsa y e compania a bira obheto di un disputa entre e gobierno de facto di Maduro y e gobierno interino di Juan Guaido. Guaido a nombra directornan nobo pa Pdvsa tambe, y a pidi hues di canciyeria di Delaware pa rechasa un oferta pa cambia nan cu su propio candidatonan.

Desde cu presidente di Merca, Donald Trump, a declara cu pa Merca Guaido ta e presidente legitimo di Venezuela pa loke ta ley di Merca, esaki lo a otorga Guaido e poder pa nombra e directornan y Maduro no tin motibo legal pa desafia nan, segun Ken Nachbar, un di e abogadonan di Guaido, a bisa hues McCormick. E hues a bisa cu e lo dicidi despues riba e asunto aki.

E abogadonan di Maduro ta tratando di “lanta suficiente stof” pa sconde e claridad di e casonan di Corte Supremo Mericano cu ta certifica autoridad di Trump pa reconoce gobiernonan di otro pais, segun Nachbar, cu ta haya cu e Hues mester laga e decision na poder ehecutivo,

Segun abogadonan di Maduro ta argumenta, cu ainda e ta e gobernante defacto di Venezuela, pa cual e tin e poder pa nombra directornan di e compania petrolero estatal. Nan ta haya cu Guaido y su ekipo ta dunando un interpretacion demasiado amplio na e decisionnan hudicial cu ta ratifica e poder di Trump pa reconoce otro gobierno.

E abogadonan di Maduro ta argumenta cu Asamblea Nacional a aproba un resolucion cu a autorisa Guaido cambia e hunta di Pdvsa, pero cu Tribunal Constitucional di Venezuela a declara esaki como inconstitucional.

Varios tribunal na Merca a reconoce e autoridad exclusivo di Guaido pa representa Venezuela den e casonan legal na Merca. Ningun a pronuncia encuanto si e lista di director di Guaido ta controla legitimamente e subsidiarionan Mericano di Pdvsa.

 

LEAVE A REPLY

Please enter your comment!
Please enter your name here