Venezuela: Guaido ta spera mas di un miyon boluntario

Presidente encarga Juan Guaido a pone ayera e meta di yega na un miyon boluntario cu mester enfrenta e blokeo di e regimen di Nicolas Maduro na entrada diasabra venidero di e ayudo humanitario recolecta na Colombia, Brasil y Curaçao, e mayoria manda pa Merca. Den un mensahe e lider opositor a laga sa cu ya a registra mas di 600.000 boluntario.

Riba solicitud di Guaido, reconoci como mandatario interino pa 50 pais, gruponan di boluntario a cuminsa traha diadomingo na varios estado di e pais den reunion di preparacion y den e asina yama campamentonan humanitario.

Guaido asigura cu e pais “ta prepara pa e avalancha humanitario,” aunke cu e no kier a revela detaye tocante con lo vence e cerco imponi pa Maduro.

“Nos ta bay ta anuncia cosnan specifico, poco poco. Hugada gana no ta canta,” el a bisa.

Maduro a ordena e militarnan pa blokia e entrada na e pais di e ayudo di medicina y alimento, considerando esaki un “show politico” y e inicio di un invasion militar Mericano.

E situacion ta hopi sensitivo na un pais cu ta biba den un debacle economico cu escasez di medicina y alimento, unda e hiperinflacion ta haci cumpra alimento imposibel.

Guaido a scoge pa e entrada di e ayudo dia 23 di februari, ora e cumpli un luna di huramenta como presidente encarga, despues cu parlamento Venezolano a declara Maduro usurpador di presidencia despues di eleccion fraudulento.

Tres avion militar di Merca a yega diasabra pasa na Cucuta, unda ta almacena ayudo desde dia 7 di februari.

E senador Republicano di Merca, Marco Rubio, a yega ayera na Colombia pa reuni cu funcionarionan cu ta trahando den e centro di recoleccion na Cucuta, asina el a confirma riba su cuenta di Twitter.

Den e conferencia di Siguridad di Munchen e vice-presidente Mericano Mike Pence a urgi diasabra Union Europeo pa reconoce Guaido conhuntamente. Varios pais Europeo a haci esey caba, pero e otronan ta blokiando un posicion conhunto di e union.

 

You May Also Like

Ecuador: Gobierno ta denuncia ex minister di Correa profugo di husticia ta na Venezuela

E gobierno di Lenin Moreno a confirma diaranson pasa a traves di e minister ...

Mucha di 12 aña a muri pa desnutricion cronico

Bolivia ta bibando dianan di conmocion y drama pa un mucha muhe di 12 aña ...

Papa Francisco na Colombia: Agenda di su prome dia na Bogota

E prome bishita di un papa den 31 aña na Colombia a bin na ...

Cada biaha e respaldo internacional pa Maduro ta bira menos

Gobierno di Nicolas Maduro a sufri un progresivo aislamento internacional,  pero ainda Maduro tin ...

Gobierno buscando pa yena 40.000 puesto den cuerponan di seguridad

Ministro di Interior y Husticia di Venezuela, Néstor Reverol, a informa ayera cu 40.000 hoben ...

Brasil: Trahadonan di Ford na Sao Paulo contra ciere

Centenares di trahado di e empresa Ford na Sao Bernardo do Campo, na Sao ...