Suministro medico casi di cualkier sorto ta den escasez na Venezuela, pues trahadonan na un hospital di maternidad na Caracas ta confrontando e brote rapido di coronavirus trahando mondmask pa cirugia na man, un pa un.
Cinco trahadonan ta cera pa varios dia den kelder di hospital Concepcion Palacios, riba mashin di cose y transformando blachi di papel blauw den mondmask pa nan 2,800 colega.
Te cu diamars, nan a logra crea mas o menos mil di e mondmask traha na man.
“Nan no ta move di e mashinnan ey”, segun supervisor Silvia Bolivar, un di persona cu a organisa e proyecto. “Nan ta come y descansa eynan, te ora cu nan lanta anochi pa bay.”
El a bisa cu otro hospitalnan a cuminsa un esfuerso similar pa combati e virus. Venezuela a registra su prome 36 caso confirma di coronavirus den menos di un siman ayera, y mayoria di expertonan di salud ta bisa cu e pais – ya caba luchando cu un crisis economico y escasez amplio, no ta prepara pa locual ta biniendo.
Hospitalnan tin mester di mondmask, glove, medicina, y algun di nan hasta awa, segun trahadonan di salud. “Nos mester tin mas seguridad, mondmask apropia, pero nos ta den e emergencia aki”, segun Yordania Mata, un trahado di 34 aña di edad.
Presidente Nicolas Maduro dialuna a duna orden na henter e pais pa keda cas bou cuarentena cu meta di reduci e transmision di e virus nobo, yamando e medida ‘drastico y necesario’.
Maduro a culpa hopi di e problema riba sancionnan Mericano, maske escasez a cuminsa hopi prome cu a impone esakinan.
Enfrentando e pandemia nobo, el a bisa cu ‘si un problema presenta na algun hospital, nos mester resolve esaki. Nos no mester purba converti esaki den un asunto politico, sino den cooperacion entre nos tur’.
