E ex-general Venezolano Hugo Carvajal, antiguo hefe di contra-inteligencia militar di su pais pa Hugo Chavez, a ser deteni ayera pa Polis Nacional Spaño a peticion di husticia Mericano, pa un delto economico.
Fuentenan policial a indica na agencia Efe cu e detencion a tuma lugar na Madrid pa 15:30 ora local, a base di un orden di extradicion emiti pa autoridadnan Mericano pa un delito relaciona cu labamento di placa procedente di trafico d droga.
Carvajal, di 59 aña di edad, y conoci pa su apodo “el Pollo”, tabata homber di confiansa di e anterior presidente Hugo Chavez, cu na februari ultimo a declara su respaldo na e presidente interino Juan Guaido, distabciando su mes di e regimen Chavista di presidente de facto Nicolas Maduro.
Na juli 2014 Hugo Carvajal a keda aresta na Aruba, riba peticion di autoridadnan Mericano, cu tabata busca aresto di Carvajal, cu tabata permanece regularmente na Aruba. Despues di decision di corte na fabor di extradicion pa Merca, gobierno Hulandes a dicidi di laga Carvajal, cu a keda presenta pa Venezuela como proximo consul Venezolano na Aruba, bay pa su pais considerando cu e tabata goza di inmunidad diplomatico, pero bao condicion di ‘persona non grata’ pa tempo indefini pa henter teritorio di Reino Hulandes. Carvajal na 2014 tabata busca pa autoridadnan Mericano pa su vinculona tanto cu narcotrafico como cu e organisacion guerrillero Farc, cu tabata financia su mes a traves di narcotrafico.
