Iran no ta capaz di resolve e gran problema di abastecimento di gasolin cu Venezuela tin. Si Rusia no a logra, cu tin mas experiencia den e sector petrolero Venezolano, mucho menos e intento di Iran lo logra, a pesar di e tradicion di refineria na nan pais. Pasobra e refinerianan Venezolano no por drenta den operacion atrobe, ta e trasfondo di e salida di Rosneft, di Rusia, y tambe e circunstancia cu Iran ta desea pago na oro ta indicacion cu nan no ta buscando un colaboracion duradero.

E dificultadnan di produccion di combustible na Venezuela ta haya alivio, ironicamente, pa continuacion di e actividadnan na e pais di e empresa Mericano Chevron y esen Spaño Repsol, cu ta paga e regimen cu reserva monetario internacional y cu producto refina, respectivamente. Mientras e operacionnan ey ta sigui, Washington no por bisa cu nan a cera e cerco completamente pa Nicolas Maduro.

E paro di actividad na fin di januari den e ultimo dos refinerianan operativo na Venezuela, Amuay y Cardon, ambos parti di e Compleho di Refinacion Paraguana, den su tempo e segundo refineria di mas capacidad refinador na mundo, a pone suministro di gasolin pa uso interno di e pais den problema grandi. Filanan largo na pomp di gasolin mientras e cuatro refinerianan tabata inactivo caba (El Palito, Puerto la Cruz, Bajo Grande y San Roque).

Te na januari trahadornan Ruso tabata tratando ainda pa reactiva parti di e refineria di Amuay y tene esaki operativo. Pero ora Rosneft a dicidi, bao presion Mericano, pa bandona tur actividad na Venezuela, y ni sikiera kier a keda den produccion pa mercado local, pasobra tal inversion no ta uno cu perspectiva beneficioso.

 

LEAVE A REPLY

Please enter your comment!
Please enter your name here