A pesar di e desconocemento di oposicion y gran parti di comunidad internacional, awe e dictadura di Nicolas Maduro lo instala e proximo Asamblea Nacional (AN) despues di e eleccion fraudulento dia 6 di december ultimo. Ayera, Diosdado Cabello, prome vicepresidente di Partido Socialista Unido de Venezuela PSUV a informa cu Jorge Rodriguez lo ser proponi pa presidi Parlamento.

E minister di Comunicacion di e dictadura lo ser proponi awe pa Bloque de la Patria durante e acto di instalacion di e Asamblea.

Ademas, e number dos di e chavismo a adelanta cu Iris Varela (ex-minister pa Servicio Plenipotenciario) lo ser proponi pa e cargo di prome vicepresidente di e organo legislativo; y Didalco Bolivar, lider di partido Por la Democracia Social pa e segundo vicepresidente. Rosalba Gil y Yndi Inojosa, en tanto, lo ser proponi pa ta a cargo di e secretaria.

Di su banda, Maduro a anuncia cu Cabello, kende a presidi Asamblea Nacional Constituyente Chavista, lo asumi ‘e hefatura di e Bloque de la Patria dentro di e Asamblea Nacional’.

E actual hefe di parlamento di Venezuela, e opositor Juan Guaido, a reitera diadomingo ultimo cu e lo instala un periodo nobo di sesionnan awe a pesar cu Constitucion ta dicta cu e poder legislativo cu ta presidi mester termina prome cu e fecha ey.

Tabata spera e medida aki desde cu dia 26 di december ultimo, Parlamento, di claro mayoria opositor, a bay di acuerdo pa extende cu un aña nan funcionnan cu base riba un principio di ‘continuidad constitucional’. E diputadonan a tuma e decision aki despues di rechasa e resultadonan di eleccionnan legislativo dia 6 di december cu chavismo a gana facilmente memey di abstencion halto y cuestionamento internacional riba su transparencia.