(ElNacional) – Nicolas Maduro a acusa Merca y e Organisacion di e Tratado Atlantico Norte (OTAN) di kier caba via e caminda militar cu Rusia y a reafirma full su apoyo pa e pais Euro-Asiatico den e crisis cu Ucrania.
“Nos ta observando atentamente e acontecimentonan na Rusia, na Ucrania, observando for di aworaki e evolucion di e proceso unda e imperio Norte Americano y OTAN ta pretende via e caminda militar caba cu Rusia, stop Rusia y caba cu e mundo aki multipolar cu ya ta un realidad”, el a expresa den un acto transmiti pa e canal di television estatal Venezolana de Television (VTV).
Maduro a ratifica full su respaldo pa e presidente Vladimir Putin den e defensa pa e paz di Rusia, di e region y di su pueblo.
“E teritorio di Lugansk y Donetsk a asumi funcionnan de republicanan popular pa defende nan mes di un masacre unda cu e sectornan fascista cu a asalta e poder na Ucrania a cuminsa ehecuta homber, asaltando famianan, bombardiando, cu armanan pisa y a cuminsa un conflicto hopi duro”, el a opina, aunke e no a aclara si e ta reconoce e provincianan aki manera nacionnan independiente.
Maduro a sostene cu durante tur e etapanan di e conflicto semper tabat’ey presente e diplomacia di e presidente Ruso, pero cu e banda drechi extremista cu e gobierno di Ucrania a gana nunca tabata interesa den resolve e conflictonan pa medio di dialogo, nunca e tabata interesa den respeta Rusia.
Dia 17 di februari Maduro a ratifica cu su pais ta ariba e caminda di un cooperacion militar poderoso cu Rusia, despues di un reunion cu e vice prome minister di e pais ey,. Yuri Borisov.
