Presidente Venezolano Nicolas Maduro a anuncia cu militar y politiconan di e regimen lo tin prioridad pa vacunacion contra Covid-19 na Venezuela.

Entre e sectornan prioritario tambe ta ‘e 14mil brigada di bishita cas pa cas’ – partidarionan di e regimen cu, Maduro ta sigura, a duna siguimento na e contagionan – e personal di ‘trabao social cu permanentemente ta bishitando hogarnan, atendiendo necesidadnan’ y e ‘personal di seguridad cu ta riba caya protegiendo hente’, el a bisa.

E dictador tambe a detaya den un mensahe publico cu e funcionarionan di e regimen y e diputadonan di Asamblea Nacional chavista – no reconoci pa gran parti di comunidad internacional – tambe lo tin prioridad, mientras cu Maduro mes y su esposa Cilia Flores, tambe diputado, tambe lo forma parti di e grupo aki.

Maduro a bisa cu ta spera cu pa april Venezuela lo ta den ‘un fase di vacunacion masivo’ y cu e pais por conta cu e vacunanan cu Cuba, China y Rusia ta desaroya, y esnan adkiri a traves di e mecanismo COVAX, maske a destaca cu ta e Instituto Nacional di Higiena cu ‘lo tin ultimo palabra’ tocante su posibel aprobacion. Den e caso aki, Venezuela no a paga e suma cu ta rekeri pa obtene e vacuna gestiona pa Organisacion Mundial di Salud (WHO), y Organisacion Panamericano di Salud (PAHO) a indica diaranson cu pa esaki lo mester paga adelanta $18 miyon.

Maduro ademas a recuri na su aliado Rusia pa adkiri 10 miyon dosis di vacuna Sputnik V, di cual diasabra ultimo a yega e prome lote di 100mil dosis, cu lo cuminsa aplica mesora na personal sanitario. “Nos a aproba e vacuna Sputnik V pasobra estudionan cientifico di nos a comproba su seguridad total, absoluto”, el a subraya.

Vacunacion priva

Den e mesun conferencia di prensa, e dictador Venezolano a mustra abierto pa permiti operacion di un sector priva pa vacunacion contra Covid-19 na e pais, como un forma pa contraresta e ‘blokeo’ di recurso cu, segun el a bisa, a complica e compra di vacuna.

“Por ta… memey di e bataya contra e sancionnan e no lo ta malo”, el a bisa.

E mandatario asina a duna orden pa Comision Presidencial pa Prevencion y Control di Covid-19, encabesa pa vicepresidente ehecutivo Delcy Rodriguez, realisa un estudio hunto cu Ministerio di Salud pa evalua e posibilidad di permiti e mercado priva di vacuna.

Den varios ocasion Maduro a denuncia cu Venezuela tin recursonan blokea pa Merca y, maske den menor medida, otro paisnan, loke a complica e compra di vacuna pa inmunisacion di e poblacion.

E situacion a conduci e regimen y representantenan di oposicion lidera pa Juan Guaido sinta na mesa pa acorda e compra di vacuna y accede na e mecanismo COVAX, un iniciativa di colaboracion mundial cu ta busca acelera e desaroyo di tratamento, prueba y metodo di prevencion di Covid-19.

Guaido a sigura di ta dispuesto pa busca e recursonan pa su pais por ingresa e programa, pero su implementacion ta depende riba regimen di Maduro aceptando e schema di PAHO, cu ta coordina e mecanismo aki den e region.

Maduro a indica diaranson ultimo cu e negociacion ‘ta den pleno desaroyo’ y cu ta spera cu lo termina di forma faborabel y exitoso.

 

LEAVE A REPLY

Please enter your comment!
Please enter your name here